मालिका गाउँपालिकाको कार्यशैलीप्रति एमालेको असन्तुष्टि, १७बुँदे माग प्रस्तुत

News Summary

Generated by OK AI. Editorially reviewed.

मालिका गाउँपालिकामा योजनाहरूको कार्यान्वयन र वितरणमा पारदर्शिता र परिणाममुखीता अभाव रहेको आरोप लगाइएको छ।
नेकपा एमालेले गाउँपालिकाको नेतृत्व र योजनाहरूको कार्यशैलीमा सुधारको माग गर्दै आन्दोलनको चेतावनी दिएको छ।
गाउँपालिकाका योजनाहरू मुख्य रूपमा डोजरे विकासमा केन्द्रित भएको र स्वास्थ्य, शिक्षा, आयआर्जन लगायतका क्षेत्रमा ध्यान नदिइएको उल्लेख छ।

३१ वैशाख, गुल्मी । मालिका गाउँपालिकाको कार्यसम्पादन मितव्ययी, पारदर्शी र परिणाममुखी नभएको भन्दै नेकपा एमाले मालिका गाउँपालिका कमिटीले ज्ञापनपत्र बुझाएको छ ।

एमाले मालिका गाउँपालिका अध्यक्ष शोभाखर गिरीको नेतृत्वमा गएको प्रतिनिधिमण्डलले पालिका अध्यक्ष देवीराम अर्याललाई ज्ञापनपत्र बुझाएको हो ।

ज्ञापनपत्रमा स्थानीय सरकारबाट छनोट गरिएका योजनाहरू टुक्रे र वितरणमुखी भएकाले सकारात्मक परिणाम आउन नसकेको, आसेपासे र शक्तिशालीहरूको प््रभावमा योजना छनोट गरी विपन्न तथा सीमान्तकृत क्षेत्रका जनतालाई विकासको अवसरबाट बञ्चित गरिएको, योजनाको कार्यान्वयन फितलो, र अपारदर्शी तथा गुणस्तरहीन रहेको उल्लेख छ ।

यस्तै, अधिकांश योजना डोजरे विकासमा आधारित रहेको, स्वास्थ्य, शिक्षामा सुधार, आयआर्जन र स्वरोजगार वृद्धिजस्ता कुरामा ध्यान नदिइएको, विपत् व्यवस्थापन तथा वातावरण सुधार, सुशासन तथा सेवाप्रवाहलाई प्रभावकारी बनाउन पालिका नेतृत्वले ध्यान नदिएको ज्ञापनपत्रमा उल्लेख छ ।

विभिन्न १७ बुँदामा माग राखेको एमाले कमिटीले आफ्ना सरोकार बेवास्ता गरिए आन्दोलन गर्ने चेतावनीसमेत दिएको छ ।