११ गतेदेखि गण्डकीको बजेट अधिवेशन, भोलिपल्टै बजेटको सिद्धान्त पेश

News Summary

Generated by OK AI. Editorially reviewed.

गण्डकी प्रदेश सरकारले जेठ ११ गतेबाट बजेट अधिवेशन सुरु गर्न लागेको छ र यसका लागि तयारी तीव्र रूपमा भइरहेको छ।
सरकारले लोकप्रिय बजेटभन्दा बढी अनुशासनयुक्त र व्यावहारिक बजेट ल्याउने योजना बनाएको छ।
यस वर्षको बजेटको आकार गत वर्षको भन्दा कम हुने गरी लगभग २९ अर्ब ५० करोड रुपैयाँको योजना बनाइरहेको छ।

१ जेठ, पोखरा । जेठ ११ गतेबाट गण्डकी प्रदेश सभाको बजेट अधिवेशन सुरु हुने भएको छ । चैत २६ गते सातौं अधिवेशन सकिएको थियो ।

सरकारले बजेट ल्याउनुभन्दा १५ दिनअगाडि नै संसद्‌मा बजेटका प्राथमिकता र सिद्धान्तमाथि छलफल गर्नुपर्ने भएकाले पनि आठौं ११ बतेबाट आठौं अधिवेशन बोलाउने निर्णय सरकारले गरेको हो ।

सरकारका प्रवक्ता तथा अर्थमन्त्री डा. टकराज गुरुङका अनुसार १२ गते सभामा बजेटका सिद्धान्त र प्राथमिकता पेश गर्ने तयारी छ ।

प्रदेश सरकारले मन्त्रालयहरूलाई सिलिङ लिएर अहिले बजेट निर्माणको काम गरिरहेको छ ।

बजेट निर्माणको काम चलिरहँदा यतिबेला सबैजसो मन्त्रालयहरूमा योजना माग गर्दै कागजात लिएर पुग्नेहरूको लर्को लागिरहेको छ ।

भौतिक पूर्वाधार तथा यातायात मन्त्रालय, सामाजिक विकास, अर्थ मन्त्रालय, मुख्यमन्त्री तथा मन्त्रिपरिषद्को कार्यालय, पर्यटन, कृषि मन्त्रालय लगायतमा योजनाका फाइल बोकेर नेता कार्यकर्ताहरू पुगिरहेका छन् ।

अर्थमन्त्री तथा सरकारका प्रवक्ता डा। गुरुङले भने यसपटक अनुशासित बजेट ल्याउने बताए । ‘बजेट दुई खाले हुने रहेछ, एउटा लोकप्रिय तर अलि अनुशासन भंग, अर्को अनुशासित तर कम लोकप्रिय,’ डा. गुरुङले भने ‘हामीले लोकप्रियभन्दा अनुशासित बजेट ल्याउने तयारी गरेका छौं ।’

केन्द्रले ल्याएको नीति तथा कार्यक्रम, बजेटको सिद्धान्त र प्राथमिकतासमेत हेरेर गण्डकीमा नीति तथा कार्यक्रम, बजेटका सिद्धान्त र प्राथमिता तय गरिरहेको र अब बजेट पनि त्यसरी नै आउने अर्थमन्त्री गुरुङको भनाइ छ ।

३२ अर्ब ५७ करोडको चालु बजेट ल्याएको सरकारको यसपटक भने आकार घट्ने भएको छ ।

अहिले करिब २९ अर्ब ५० करोड रुपैयाँको बजेट ल्याउने गरी मन्त्रालयहरुमा सिलिङ दिएर योजना छनोटको काम भइरहेको छ ।