१५ जेठको कार्यक्रममा खटिने स्वयंसेवकलाई एमालेले दियो प्रशिक्षण

News Summary

Generated by OK AI. Editorially reviewed.

नेकपा एमालेले १५ जेठमा काठमाडौंमा गणतन्त्र दिवसको उत्सव मनाउने कार्यक्रम तय गरेको छ।
एमालेले स्वयंसेवकहरूलाई सभा व्यवस्थापन लागि प्रशिक्षण दिएको छ।

१४ जेठ, काठमाडौं । भोलि १५ जेठ अर्थात गणतन्त्र दिवस । गणतन्त्र दिवसलाई उत्सवको रूपमा मनाउने भन्दै नेकपा एमालेले बिहीबार काठमाडौंको भृकुटीमण्डपमा सभा आयोजना गर्दैछ ।

सोही सभालाई लक्षित गरी एमालेले बुधबार पार्टी कार्यालय च्यासलमा स्वयंसेवकहरूलाई प्रशिक्षण दिएको छ ।

प्रशिक्षणमा सहभागी स्वयंसेवकहरूले सभालाई व्यवस्थित बनाउन सघाउने एमालेले भनेको छ ।

राजावादीहरूले पनि १५ जेठमा काठमाडौं केन्द्रित आन्दोलन गर्दैछन् । उनीहरूले काठमाडौंको कुन क्षेत्रमा आन्दोलन गर्ने भनेर प्रहरी प्रशासनसँग अनुमति लिएका छैनन् ।

एमाले महासचिव शंकर पोखरेलले १५ जेठमा सरकारले नै विशेष कार्यक्रम गरेर गणतन्त्रको उत्सव मनाउनु पर्ने बताएका छन् ।

बुधबार पत्रकार सम्मेलनमा उनले भने, ‘१५ जेठ भनेको नेपाली जनता सार्वभौम भएको दिन हो । यो दिनको महत्त्व जनतालाई दर्शाउँदै सरकारले उत्सवका रूपमा मनाउनुपर्छ,’ उनले भने ।

एमालेले भोलि गर्न लागेको कार्यक्रम कसैको विरोधमा नभई जनताको उपलब्धिको खुसियाली प्रकट गर्ने समारोह रहेको बताएको छ ।