दीया पुनले चढिन् युरोपको अग्लो हिमाल, फर्फराइन राष्ट्रिय झण्डा

News Summary

Generated by OK AI. Editorially reviewed.

अभिनेत्री दीया पुनले युरोपको माउन्ट एल्ब्रस आरोहण गरेकी छन्।
उनी ‘सेभेन समिट’ अभियानअन्तर्गत सात महादेशका अग्ला हिमाल आरोहण गर्दैछिन्।
उनले आफ्नो फिल्म ‘एक्लो’ कान्स फिल्म मार्केटमा प्रस्तुत गरेकी छन्।

काठमाडौं । अभिनेत्री दीया पुनले युरोपको अग्लो हिमाल ‘माउन्ट एल्ब्रस’को सफलतापूर्वक आरोहण गरेकी छन् । उनको आरोही दल एलिट एक्सिपिडिसनका अनुसार मंगलबार बिहान १० बजे उनी ५,६४२ मिटर उचाइको हिमाल चढेकी हुन् ।

अभिनेत्री पुनले पनि सामाजिक संजालबाट यसबारे जानकारी दिएकी छन् । ७ महादेशका सबै अग्ला हिमाल आरोहण गर्ने अभियानमा निस्किएकी दीयाले यसअघि सगरमाथा, अफ्रिकाको अग्लो माउन्ट किलिमन्जरो, दक्षिण अमेरिकाको अग्लो अकोनकागा हिमाल चढेकी छन् ।

उनी यतिबेला ‘सेभेन समिट’ अभियानमा छिन् ।

माउन्ट एल्ब्रसमा उनले नेपालको राष्ट्रिय झण्डासहित तमु समाज र बेलायती गुर्खाको झण्डा पनि लगेकी थिइन् । अब उनी उत्तर अमेरिकाको अग्लो अलाकास्थित डिनाली, अन्टार्कटिकाको अग्लो भिन्सोन मासिफ र इण्डोनेसियास्थित पञ्जय जयको आरोहण गर्ने उनको तयारीमा छिन् ।

हिमाल चढ्नु महंगो भएको र आफू जागिरे र फिल्ममा समेत व्यस्त हुनुपर्ने भएकाले यी हिमाल चढ्न केही समय लाग्ने उनको भनाइ छ । पेशाले उनी नर्ससमेत हुन् ।

उनको फिल्म ‘एक्लो’ कान्स फिल्म मार्केटमा पुगेका थिए । यो फिल्ममा उनले पुन नामक अन्तरीक्षयात्रीको भूमिका निर्वाह गरेकी छन् । गतवर्ष उनको शीर्ष भूमिका रहेको फिल्म ‘दयारानी’ सुपरहिट बनेको थियो ।