सुमनाको प्रश्न– विधेयक संसदले बनाउने कि संघ संगठनले ?

News Summary

Generated by OK AI. Editorially reviewed.

सांसद सुमना श्रेष्ठले ऐन, कानून बनाउने अधिकार संसदलाई हो कि संघसंगठनलाई भन्ने प्रश्न उठाइन्।
उनले भने, ‘यो कानुन बनाउँदै नबनाउने हो भने यो गणतन्त्रको के काम ?’ र विधेयक बनाउने प्रक्रिया स्पष्ट हुन आवश्यक रहेको बताइन्।
सांसद श्रेष्ठले राजनीतिक दोहोरो चरित्र र बजेटको व्यावहारिकता प्रति आपत्ति जनाइन्।

३१ जेठ, काठमाडौं । राष्ट्रिय स्वतन्त्र पार्टी (रास्वपा) सांसद सुमना श्रेष्ठले ऐन, कानून जननिर्वाचित संसदले बनाउने कि संघसंगठनले बनाउने भन्दै प्रश्न गरेकी छिन् ।

शनिबार शिक्षा, स्वास्थ्य तथा सूचना प्रविधि समितिको बैठकमा बोल्दै सांसद श्रेष्ठले ऐन, कानून संघसंगठनले बनाउने हो भने जननिर्वाचित संस्था र गणतन्त्रको के काम भन्दै आक्रोश व्यक्त गरेकी हुन् ।

नेताहरू राजनीतिक भाषण दिन जान्ने तर कुनकुन कानुनले काम गर्छ भनेर थाहा नपाउने अवस्था रहेको सांसद श्रेष्ष्ठको भनाइ थियो ।

‘अंग्रेजी उखान अनुसार ‘कुकुरले पुच्छर हल्लाउने कि ? पुच्छरले कुकुर हल्लाउने ?’ भन्ने मेरो प्रश्न छ । हामीले विधेयक बनाउने कि संघ संगठनले बनाउने ? यो कानुन बनाउँदै नबनाउने हो भने यो गणतन्त्रको के काम ?,’ उनले प्रश्न गरेकी छिन् ।

निजी र सामुदायिकका बीचमा जुन काम हुनुपर्ने हो त्यो पनि नभएको उनको भनाइ थियो । हरेक सांसदलाई तीन तीन करोड बाँड्ने आयोजना रोक्नुपर्ने उनले बताइन् ।

‘राजनीतिक दोहोरो चरित्र भयो । बजेटमा शिक्षाको बजेट २ खर्ब ११ अर्ब छ सुन्दा सबैभन्दा ठूलो छ,’ उनले भनिन्, ‘यसपाली महंगी भत्ता बढाउने भनिएको थियो पोहोरभन्दा ३ हजार बढाइयो पनि । तर, त्यसमा शिक्षकलाई कसरी समायोजन गरिन्छ भन्ने कुरा प्रतिवेदनमा उल्लेख अझै हुन सकेको देखिएन ।’