५ हाइड्रोपावर कम्पनीको सेयरमा एक महिनाभित्र लकइन अवधि सकिँदै

News Summary

Generated by OK AI. Editorially reviewed.

पाँच हाइड्रोपावर कम्पनीको लकइन अवधि असार महिनाभित्रै समाप्त हुँदैछ।
सेयरको मूल्य घट्ने जोखिमलाई मध्यनजर गर्दै कम्पनीहरूले सूचनादिएका छन्।
लकइन अवधि सकिने सेयरमा कुल ४ करोड ५६ लाख ९६ हजार ९६० कित्ता सेयर समावेश छन्।

२ असार, काठमाडौं । एक महिनाभित्र ५ वटा हाइड्रोपावर कम्पनीको संस्थापक, आयोजना प्रभावित स्थानीय तथा कर्मचारीको सेयरमा लकइन अवधि सकिने भएको छ ।

लकइन अवधि सकिएको भोलिपल्टबाट यी सेयर साधारणसरह, उहीं मूल्यमा कारोबारमा आउँछन् । जसले गर्दा सेयर संख्या बढ्न गई मूल्य घट्ने जोखिम रहन्छ । यहीं जोखिमलाई मध्यनजर गर्दै नियामक धितोपत्र बोर्डको निर्देशनपछि कम्पनीहरूले एक महिना पहिले नै सार्वजनिक सूचनामार्फत जानकारी दिँदै आएका छन् ।

५ कम्पनी विन्ध्यबासिनी हाइड्रोपावर, दोर्दीखोला जलविद्युत् कम्पनी, हिमालयन हाइड्रोपावर, अपर सोलु हाइड्रो इलेक्ट्रिक कम्पनी र अपर हेवाखोला हाइड्रोपावर कम्पनीको सेयरमा असार महिनाभित्रै लकइन अवधि सकिन लागेको हो ।

विन्ध्यबासिनी हाइड्रोपावरको संस्थापक, कर्मचारी र स्थानीय प्रभावितको गरी कुल ९६ लाख ७१ हजार ८८ कित्ता सेयरमा आज सोमबार (असार २) बाट लकइन अवधि समाप्त हुने भएको छ ।

त्यस्तै दोर्दीखोला जलविद्युत् कम्पनीको संस्थापक, स्थानीय प्रभवित र कर्मचारीको गरी कुल ८४ लाख १२ हजार ९६० कित्ता सेयरमा असार ७ गते लकइन अवधि सकिने भएको छ ।

हिमालयन हाइड्रोपावर कम्पनीको संस्थापक, आयोजना प्रभावित र कर्मचारीको गरी कुल ९० लाख २१ हजार ११५ कित्ता सेयरमा असार २७ गते लकइन अवधि सकिँदैछ ।
अपर सोलु हाइड्रो इलेक्ट्रिक कम्पनीको कुल १ करोड १५ लाख ८१ हजार ६५० कित्ता सेयरमा असार २९ गतेदेखि लकइन अवधि सकिने भएको छ ।

अपर हेवाखोला हाइड्रोपावर कम्पनीको संस्थापक सेयर, कर्मचारी र स्थानीयबासीको गरी कुल ३५ लाख कित्ता सेयरमा असार ३१ गते लकइन अवधि सकिने भएको छ ।