कोमल वलीले ल्याइन् तीज गीत ‘सुनिदेऊ शिव’

News Summary

Generated by OK AI. Editorially reviewed.

लोकगायिका कोमल वलीले आउँदो तीजलाई लक्षित गर्दै नयाँ गीत 'सुनिदेऊ शिव' युट्युबमा सार्वजनिक गरेकी छन्।
गीतमा एक चेलीले तीजमा धर्मअनुसार व्रत बसेर महादेवसँग मनको मर्म सुनाइदिन आग्रह गरेकी छन्।
कोमल वलीले गीतको शब्द, संगीत र स्वर आफैं तयार गरेकी छन् र यसअघि पनि चर्चित तीज गीतहरू ल्याएकी छन्।

वर्ष दिनको तीज आयो
गाउँछु तीजका गीत त
फेरि पनि पुकार गर्छु महादेवसित
बसेकै छु तीजमा व्रत
गरेकै छु धर्म
अब त सुन्देऊ शिव
यो चेलीको मर्म

लोकगायिका कोमल वलीले आउँदो तीजलाई लक्षित गर्दै नयाँ गीत ‘सुनिदेऊ शिव’ युट्युबमा सार्वजनिक गरेकी छन् ।

बुधबार सार्वजनिक गीतको शब्द, संगीत र स्वर कोमलको आफ्नै छ । हरेक वर्ष भिन्न मर्म र शैलीका तीज गीत ल्याउने कोमलले यसपटक शान्त र भावुक गीत ल्याएकी छन् ।

गीतमार्फत एक चेलीले तीजमा धर्मअनुसार व्रत बसेर महादेवसँग मनको मर्म सुनाइदिन आग्रह गरेकी छन् । भाकामा शान्त लय छ र शब्दमा सरलता, जसले गीतलाई धार्मिक भावनासँग जोडेको छ ।

कुनै झिलिमिली भिडियो वा चम्किला शब्द नभई गीतमा आत्मीयता र भक्ति झल्किन्छ ।

वलीले अघिल्ला वर्षमा ल्याएको ‘पोइला जान पाम’, ‘तीजमा रमाइलो’, ‘बोल्नेलाई बोल्न देऊ’ निकै चर्चित रहे । लोकसंगीत मात्र होइन, संचारकर्म र राजनीतिमा पनि उनी उत्तिकै सक्रिय छिन् ।

दाङमा जन्मिएकी वलीको सांगीतिक यात्रा २०४६ सालमा रेडियो नेपालको लोकगीत प्रतियोगिताबाट सुरु भएको हो । त्यसपछि उनले रेडियो नेपालमा झण्डै २३ वर्ष समाचारवाचन, कार्यक्रम सञ्चालन र प्रस्तुति कार्यमा बिताइन् ।

गीतसंगीतसँगै सञ्चार र सार्वजनिक जीवनमा सक्रिय रहेकी उनी केहीवर्ष देखि राजनीतिमा पनि सक्रिय छिन् । ‘सुनिदेऊ शिव’मार्फत उनले फेरि एकपटक तीजको गहिरो पक्ष दर्शाउने प्रयास गरेकी छन् ।