नीतिगत दर परिवर्तनपछि पहिलो निक्षेप संकलन, औसत ब्याजदर २.७४ प्रतिशत

४ साउन, काठमाडौं । नेपाल राष्ट्र बैंकले आइतबार नयाँ आर्थिक वर्ष सुरु भएपछिको पहिलो निक्षेप संकलन उपकरण जारी गरेको छ ।

केन्द्रीय बैंकले मौद्रिक नीतिमार्फत स्थायी निक्षेपको ब्याजदर घटाएपछि तरलता खिच्न प्रयोग भएको यो पहिलो निक्षेप संकलन हो ।

केन्द्रीय बैंकले चालु आर्थिक वर्षदेखि ब्याजदर करिडोरको माथिल्लो सीमा ६ प्रतिशत कायम गरेको छ । त्यसैगरी तल्लो सीमा २.७५ कायम गरेको छ भने नीतिगत दर ५ प्रतिशतमा झारेको छ ।

करिडोको तल्लो सीमा घटेसँगै केन्द्रीय बैंकले आइतबार ५० अर्ब रुपैयाँ प्रणालीबाट खिचेको हो । केन्द्रीय बैंकले उक्त निक्षेप संकलन उपकरणमा दिने ब्याजदर करिडोरको तल्लो सीमाभन्दा धेरै दिँदैन । तर, पनि निक्षेप संकलन ब्याजदर भने बोलकबोल विधिमार्फत निर्धारण हुन्छ ।

आइतबार केन्द्रीय बैंकले जारी गरेको ४२ दिने ५० अर्ब निक्षेप संकलनका लागि ५६ अर्ब ६० करोड रुपैयाँ बराबरको माग आवेदन परेको छ ।

तर, केन्द्रीय बैंकले अधिकतम ब्याजदर करिडोरको तल्लो सीमाभन्दा माथि दिएको छैन भने न्यूनतम २.७४ प्रतिशतसम्मको ब्याजदरमा निक्षेप संकलन गरेको छ । आइतबारको निक्षेप संकलनको औसत ब्याजदर २.७४७६ प्रतिशत कायम छ ।

आइतबारसम्ममा केन्द्रीय बैंकमा बैंक तथा वित्तीय संस्थाको ६ खर्ब ९३ अर्ब ९३ करोड रुपैयाँ छ । यो रकम निक्षेप संकलनको ४ खर्ब हो भने स्थायी निक्षेप सुविधाको २ खर्ब ९३ अर्ब रहेको केन्द्रीय बैंकले जनाएको छ ।