नागरिक लगानी कोषले सिद्धार्थ बैंकको उपदान तथा अवकाश कोष सञ्चालन गर्ने

६ साउन, काठमाडौं । नागरिक लगानी कोष र सिद्धार्थ बैंक लिमिटेडबीच उपदान तथा अवकाश कोष सञ्चालन सम्बन्धी सम्झौता भएको छ ।

सम्झौतामा कोषका तर्फबाट कार्यकारी निर्देशक पर्वतकुमार कार्की र बैंकका तर्फबाट प्रमुख कार्यकारी अधिकृत सुन्दरप्रसाद कँडेलले हस्ताक्षर गरे ।

यो सम्झौतासँगै बैंकले हाल सञ्चालन गर्दै आएको योगदानमा आधारित तथा गैरयोगदानमा आधारित उपदान तथा अन्य अवकाश खाता कोषहरूमा हस्तान्तरण भएको छ ।

हाल बैंकमा कार्यरत करिब २ हजार कर्मचारीको उपदान एवं अवकाशसँग सम्बन्धित अन्य रकम व्यवस्थापन तथा सञ्चालन अब कोषले गर्ने छ ।

चालु आर्थिक वर्ष २०८२/८३ देखि नेपाल सरकारले साविकमा आन्तरिक राजस्व विभागबाट स्वीकृत प्राप्त अवकाश कोषहरू नागरिक लगानी कोष लगायत अन्य कोषमा आबद्ध हुनुपर्ने व्यवस्था गरे बमोजिम आर्थिक ऐन २०८२ मा भएको संशोधन अनुरूप बैंक आफूले सञ्चालन गर्दै आएको अवकाश कोष नागरिक लगानी कोषमा हस्तारण गरेको हो ।

३१ असारमा आन्तरिक राजस्व विभागले एक सूचना जारी गरी आर्थिक ऐन २०८२ को दफा २३ मा आयकर ऐन २०५८ बमोजिम साविकमा आन्तरिक राजस्व विभागबाट स्वीकृत प्राप्त अवकाश कोषहरू २०८३ असार मसान्तभित्र नागरिक लगानी कोष लगायत कोषमा आबद्ध हुनुपर्ने व्यवस्थाको जानकारी समेत गराएको छ ।