भदई बैठाका छोराका लागि जुट्यो साढे ६ लाख सहयोग, स्वास्थ्य सुधारोन्मुख

६ साउन, काठमाडौं । भदई बैठाका छोरा सुनिलको स्वास्थ्य सुधारोन्मुख भएको चिकित्सकले बताएका छन् । उपचारमा संलग्न वरिष्ठ न्यूरो सर्जन डा. राजीव झाका अनुसार सुनिल बिस्तारै हिँड्डुल गर्न सक्ने भएका छन् ।

‘सुनिलको स्वास्थ्य सुधारोन्मुख छ । बिस्तारै बोल्न पनि थालिसकेका छन्,’ डा. झाले भने ।

डा. झाका अनुसार सुनिलको टाउकोको ट्युमर सानो हुँदै गएको छ ।

अनलाइनखबरमा ‘बेड नम्बर ३२२ : एक बुबाको अन्त्यहीन वेदना’ समाचार प्रकाशन भएपछि धेरै मनकारीले सहयोगका लागि हात बढाए ।

बैठाका अनुसार करिब साढे ६ लाख रकम बैंक खातामा र प्रत्यक्ष भेटेर सहयोग प्राप्त भएको हो ।

‘अस्पतालको फार्मेसीमा तिर्न बाँकी पैसा तिरिदिएँ । उपचारमा लाग्ने खर्च त्यसैबाट गरेको छु,’ बैठाले भने, ‘यो रकमले मलाई ठूलो राहत मिल्यो ।’

यो पनि पढ्नुहोस

बेड नम्बर ३२२ : एक बुबाको अन्त्यहीन वेदना

टाउको दुख्ने, बान्ता हुने, आँखा कम देख्ने लगायत समस्या देखिएपछि एक वर्ष अघि सुनिल उपचारका लागि वीर अस्पताल आएका थिए ।

उपचारको क्रममा उनको सिटीस्क्यान गराउँदा ब्रेनभित्र ठूलो ट्युमर फैलिएको देखियो । उनको टाउकोको पाँच भागमध्ये एक भाग ट्युमरले ओगटेको थियो । दिमागको दुवैतिर फैलिएको, अगाडि, पछाडि चारैतिर फैलिएको अवस्थामा ट्युमर थियो ।

डा. झाका अनुसार ट्युमर दिमागको सबै भागमा फैलिने कमै हुन्छ । यो डरलाग्दो ठाउँको ट्युमर हो ।

करिब १० सेन्टिमिटरको ट्युमर थियो । ट्यमुरलाई हटाउनका लागि तीन चरणमा शल्यक्रिया भयो । पहिलो सर्जरीमा ट्युमरको सबैभन्दा कडा र दृष्टिमा असर पुर्‍याएको भाग हटाए । त्यसपछि बिरामीको बोली र दृष्टिमा सुधार देखा पर्न थालेपछि दोस्रो सर्जरीबाट बाँकी ट्युमर हटाइयो । तेस्रो चरणमा ट्युमरका कारण मस्तिष्कमा पानी जम्ने समस्या देखिएपछि भेन्ट्रिकुलोपेरिटोनियल सट राखी ट्युमरबाट छुट्टिने पानी बाहिर निकाल्न पाइप राखिएको छ । ट्युमर पलाइरहेका कारण किमोथेरापी र रेडियसन थेरापी समेत दिइएको छ ।