डरलाग्दो तर सुन्दर ‘लाबुबु डल’ले किन विश्व ततायो ?

सन् २०१५ मा हङकङका चर्चित कलाकार कासिङ लुङले आफ्नो ‘द मन्स्टर्स’ नामक चित्र पुस्तकका लागि एउटा काल्पनिक पात्रको रूपरेखा कोर्छन् । ठूला आँखा, तिखा दाँत, लामो कान र अनौठो मुस्कान भएको उक्त पात्र पहिलो नजरमा डरलाग्दो देखिन्छ । फेरि हेर्दै गयव भने ‘क्युट’ र आकर्षक पनि लाग्छ ।

आज यो पात्र ‘लाबुबु डल’ नामले विश्वव्यापी रूपमा चिनिएको छ । खास केही छैन । तर इन्टरनेट तताएको छ । यो अन्य खेलौना गुडिया जस्तै हो । तर फेसन ट्रेन्ड बनेको छ । नयाँ केही छैन । तर नयाँ पुस्ताका लागि यो प्रिय बनेको छ ।

हुँदाहुँदै लाबुबु डल नेपालमा समेत उपलब्ध भइसकेको छ । टिकटक, फेसबुक, इन्स्टाग्राम जस्ता सामाजिक सञ्जालमा यसको चर्चा भेटिन थालिसकिएको छ । चाहे त्यो विक्रेताको भिडिओ होस् या ग्राहकको । लाबुबु डल नेपाल छिरिसकेको छ ।

तर एउटा सामान्य खेलौना कसरी ग्लोबल ट्रेन्ड बन्यो त !

लाबुबुलाई चिनियाँ खेलौना निर्माता पप मार्ट नामक कम्पनीले सन् २०२३ मा पहिलो पटक बजारमा ल्याएको थियो । यो कम्पनीले कलाकार लुङसँग सहकार्य गरेर ‘द मन्स्टर्स’ सिरिजमा यही प्रकृतिका थुप्रै गुडियाहरू बनाइसकेको थियो ।

लाबुबु विश्वव्यापी हुनुमा यसको चारित्रिक विशेषतासँगै विक्री गर्ने शैलीको ठूलो भूमिका छ । किनकि कम्पनीले यो खेलौनालाई ‘ब्लाइन्ड बक्स’ ढाँचामा बेच्ने गर्छ ।

यो भनेको ग्राहकले खेलौनाको बक्स नखोल्दासम्म कस्तो खेलौना परेको छ भनेर थाहा पाउँदैनन् । जुन कुरा आफैंमा रोमाञ्चक र रमाइलो छ । त्यहीँ उत्साहले गर्दा भित्रको खेलौना कस्तो छ भनेर पनि ग्राहकहरूले लाबुबु किन्न थाले । यो व्यापारिक रणनीतिले लाबुबुको विक्री र लोकप्रियतामा ठूलो योगदान पुग्यो ।

त्यसमा सामाजिक सञ्जालले थप महत्त्वपूर्ण भूमिका खेल्यो ।

किनकि मानिसहरूले आफूहरूलाई कस्तो प्रकारको लाबुबु पर्‍यो भनेर सञ्जालमा शेयर गर्न थाले । जसले गर्दा नकिन्ने मान्छेलाई पनि लाबुबु किन्न बाध्य पारिरहेको थियो ।

यसबाहेक एउटा घटनाको चर्चा गर्नै पर्छ ।

सन् २०२४ मा कोरियन ब्यान्ड ब्ल्याकपिङ्ककी गायिका लिसाले आफ्नो इन्स्टाग्राममा लाबुबु डलसहितको तस्बिर पोस्ट गर्छिन् । त्यसपछि त झन् लाबुबु ट्रेन्ड एकाएक भाइरल हुन्छ ।

त्यसपछि अन्य विश्वप्रसिद्ध सेलिब्रेटीहरूले पनि लाबुबुलाई ब्याग वा फेसन एक्सेससरिजका रूपमा प्रयोग गर्छन् । जसमा रिहाना, किम कार्दाशियन, डेभिड बेकहम जस्ता सेलिब्रेटीहरू पर्छन् । उनीहरूले सञ्जालमा हाल्नाले लाबुबुको माग ह्वात्तै बढ्छ ।

त्यस्तै अर्को कारण यसको भौतिक कुरा नि हो ।

लाबुबुलाई नरम र फ्लफी सामग्रीले बनाइन्छ । यसो हुँदा यसलाई प्लस टेडी पनि भनिने गरिन्छ । यसको रङ गुलाबी, बैजनी, हरियो र अन्य पेस्टल शेडहरूको मिश्रण जस्तो देखिन्छ । ठूला आँखा, तिखा दाँत, लामो कान र अनौठो मुस्कान त छँदै छ ।

अहिले बजारमा लाबुबुका विभिन्न संस्करणहरू उपलब्ध छन् । जस्तो: सामान्य, सीमित, सेलिब्रिटी संस्करण आदि । ती मध्ये कतिपय संस्करणमा बत्ती वा आवाज पनि राखिएका हुन्छन् । यीमध्ये सीमित संस्करणका लागि सङ्कलनकर्ताहरूले जोडबल नै देखाउने गर्ने गरेका छन् । त्यसो हुँदा यो गुडिया दुर्लभ र मूल्यवान् बन्न गएको छ ।

बीबीसीका अनुसार सन् २०२५ को पहिलो त्रैमासिकमा मात्रै करिब ४० करोड अमेरिकी बराबरको यो गुडिया विक्री भएको छ । आज बजारमा यो खेलौनाको मूल्य ५ हजार रूपैयाँदेखि एक लाख रूपैयाँसम्म पर्ने बताइन्छ । अझ कतिपय सीमित संस्करणहरूको मूल्य लाखौं रूपैयाँसम्म पर्नेछ ।

केही समयअघि मात्रै एउटा लाबुबु डल १ करोड बढी रूपैयाँमा विक्री भएको थियो । यसले भने लाबुबु डल केवल खेलौना नभई ‘स्टेटस सिम्बल’ र ‘लगानीको वस्तु’ बनेको देखाएको छ ।

लाबुबु डलको लोकप्रियतासँगै यससँग जोडिएका विवादहरू पनि उत्तिकै चर्चामा छन् । किनकि कतिपयले यो डललाई ‘शैतान’का रूपमा अर्थ्याइरहेका छन् । जुन यसको डरलाग्दो रूपका कारण मान्छेहरूले आरोप लगाएका हुन् ।

कतिपयले आफ्नो डल जलाउने वा फालेको भिडियो बनाएर सञ्जालमा हाल्ने पनि गरिरहेका छन् । यद्यपि यस्ता दावीहरूको कुनै ठोस प्रमाण भने छैन ।

यति हुँदाहुँदै पनि लाबुबु डलले सांस्कृतिक रूपमा प्रभाव पार्न छाडेको छैन । विशेष गरी अनौठो र क्युट चीजप्रति मोह हुने संस्कृतिको विस्तार गर्न यो डलले भूमिका खेलिरहेको छ । यसैले युवा पुस्ताबीच यो डल व्यक्तित्व र शैलीको हिस्सा बनिरहेको हो ।

तर यो ट्रेन्ड कति टिक्छ भनेर हेर्न बाँकी नै छ ।