देशभरि ८३ प्रतिशत बढी धान रोपाइँ

News Summary

Generated by OK AI. Editorially reviewed.

यस वर्ष १८ साउनसम्म देशभरि ८३.८८ प्रतिशत धान रोपाइँ सकिएको छ, जुन अघिल्लो वर्षको तुलनामा १२.५९ प्रतिशत कम हो।
मन्त्रालयका अनुसार मधेस प्रदेशमा सबैभन्दा कम ५७.२८ प्रतिशत धान रोपाइँ भएको छ, जुन अघिल्लो वर्षको ९५.२८ प्रतिशतभन्दा कम हो।
सुदूरपश्चिम प्रदेशमा यस वर्ष ९९.७२ प्रतिशत, कर्णालीमा ९६.४७ प्रतिशत, र लुम्बिनीमा ९५.९६ प्रतिशत धान रोपाइँ भएको मन्त्रालयले जनाएको छ।

१८ साउन, काठमाडौं । यस वर्ष १८ साउनसम्म देशभरि ८३ प्रतिशत बढी धान रोपाइँ भएको छ । कृषि तथा पशुपन्छी विकास मन्त्रालयका अनुसार आइतबारसम्म देशभरि ८३.८८ प्रतिशत धान रोपाइँ सकिएको हो ।

अघिल्लो वर्ष २० साउनसम्म भने ९६.४७ प्रतिशत धान रोपाइँ सकिएको थियो । यस वर्ष अघिल्लो वर्षको तुलनामा १२.५९ प्रतिशत रोपाइँ कम भएको छ ।

देशभरि १३ लाख ९१ हजार ३ सय २१ हेक्टर जमिनमा धान खेती हुने गरेकोमा अहिलेसम्म जम्मा ११ लाख ५६ हजार ६ सय ८७.८ हेक्टर क्षेत्रफलमा मात्रै रोपाइँ भएको तथ्यांकले देखाउँछ ।

मन्त्रालयका अनुसार सुदूरपश्चिम प्रदेशमा यस वर्ष ९९.७२ प्रतिशत रोपाइँ भएको छ । कुल १ लाख ७६ हजार १ सय ५१ हेक्टर क्षेत्रफलमध्ये १ लाख ५७ हजार ६ सय ५२ हेक्टरमा रोपाइँ सम्पन्न भएको हो । अघिल्लो वर्ष २० साउनसम्म शतप्रतिशत रोपाइँ भएको थियो ।

कर्णाली प्रदेशमा यस वर्ष ९६.४७ प्रतिशत रोपाइँ भएको छ । कुल ४१ हजार ४२ हेक्टर क्षेत्रफलमध्ये ३९ हजार ५९४.९४ हेक्टरमा रोपाइँ भएको हो । अघिल्लो वर्ष २० साउनसम्म कर्णालीमा ९९ प्रतिशत रोपाइँ भएको थियो ।

त्यस्तै लुम्बिनी प्रदेशमा यस वर्ष ९५.९६ प्रतिशत रोपाइँ भएको मन्त्रालयले जनाएको छ । कुल ३ लाख २ हजार ९ सय ३९ हेक्टर क्षेत्रफलमध्ये २ लाख ९९ हजार ७ सय ८ हेक्टरमा रोपाइँ भएको हो । अघिल्लो वर्ष २० साउनसम्म उक्त प्रदेशमा ९७ प्रतिशत रोपाइँ भएको थियो ।

गण्डकी प्रदेशमा यस वर्ष ८८.९७ प्रतिशत रोपाइँ भएको छ । कुल ९४ हजार १ सय ८२ हेक्टर क्षेत्रफलमध्ये ८३ हजार ७९४.२ हेक्टरमा रोपाइँ भएको हो । अघिल्लो वर्ष गण्डकीमा २० साउनसम्म ९६ प्रतिशत रोपाइँ भएको थियो ।

मन्त्रालयका अनुसार बागमती प्रदेशमा यस वर्ष ९२.९२ प्रतिशत रोपाइँ भएको छ । कुल १ लाख १५ हजार ६२१.२५ हेक्टर क्षेत्रफलमध्ये १ लाख ७ हजार ४३४.२७ हेक्टरमा रोपाइँ भएको छ । अघिल्लो वर्ष २० साउनसम्म बागमतीमा ९७ प्रतिशत रोपाइँ भएको थियो ।

यस्तै मधेस प्रदेशमा १८ साउनसम्म सबैभन्दा कम जम्मा ५७.२८ प्रतिशत रोपाइँ भएको छ । कुल ३ लाख ७२ हजार ६ सय ४५ हेक्टर क्षेत्रफलमध्ये २ लाख १३ हजार ४३८.९५ हेक्टरमा रोपाइँ सकिएको तथ्यांकले देखाउँछ । अघिल्लो वर्ष २० साउनसम्म मधेसमा ९५.२८ प्रतिशत रोपाइँ भएको थियो ।

कोशी प्रदेशमा १८ साउनसम्म ८९.०३ प्रतिशत धान रोपाइँ भएको छ । कुल २ लाख ७६ हजार ३८६.७३ हेक्टर धान रोपाइँ हुने क्षेत्रफलमध्ये २ लाख ४६ हजार ६५.४४ हेक्टरमा रोपाइँ भएको हो । अघिल्लो वर्ष २० साउनसम्म कोशीमा ९५ प्रतिशत रोपाइँ भएको थियो ।