दयाहाङपछि माओत्सेको ‘पेन्सनपट्टा’मा जोडिए गौमाया र पशुपति

News Summary

Generated by OK AI. Editorially reviewed.

माओत्से गुरुङले निर्देशन गर्न लागेको फिल्म 'पेन्सनपट्टा'मा गौमाया गुरुङ र पशुपति राई शीर्ष अभिनेत्रीका रूपमा अनुबन्धित भएका छन्।
फिल्म 'पेन्सनपट्टा'को छायांकन कात्तिक अन्त्यबाट पोखरा, ताङतिङ, बेगनास ताल आसपासमा सुरु हुने छ।
माओत्से गुरुङले भूतपूर्व लाहुरे परिवारको वास्तविक कथावस्तुमा आधारित फिल्म बनाउन लागेको बताउनुभयो।

काठमाडौं । माओत्से गुरुङले निर्देशन गर्न लागेको फिल्म ‘पेन्सनपट्टा’को शीर्ष अभिनेत्रीमा गौमाया गुरुङ र पशुपति राई अनुबन्धित भएका छन् ।

दयाहाङ राईपछि यो फिल्ममा कलाकारको लाइनअप विस्तार भएको हो । यसअघि दयाहाङलाई लिएर गुरुङले निर्देशन गरेको ‘दयारानी’ घरेलु बक्सअफिसमा सुपरहिट भएको थियो ।

गौमाया र पशुपतिले यसअघि ‘कबड्डी’ सिरिजमा सहकार्य गरिसकेका छन् । ‘पेन्सनपट्टा’को छायांकन कात्तिक अन्त्यबाट पोखरा, ताङतिङ, बेगनास ताल आसपासमा खिच्ने तयारी छ ।

भूतपूर्व लाहुरे परिवारको वास्तविक कथावस्तुमा गुरुङले यो फिल्म बनाउन लागेका हुन् । एउटा लोभी युवक कसरी दानी हुन पुग्छ भन्ने कथावस्तुमा फिल्म बन्नेछ ।

‘यो मेरी सानीआमालाई हेरेर लेखेको कथा हो । यसमा भूतपूर्व लाहुरे सन्तानको कथा छ । लाहुरे परिवेश यसमा चित्रण छ’ फिल्मबारे उनले भने, ‘मेरी सानीआमालाई हेरेर लेखिएको कथा हो । यस्तो समस्या आज पनि भूतपूर्व लाहुरेको परिवारले भोगिरहेको छ । कथालाई मासमा ल्याउन खोजेको हुँ ।’

माओत्सेकै पटकथा तथा निर्देशन रहने फिल्मको निर्माण माओत्से गुरुङ प्रोडक्सनको ब्यानरमा हुँदैछ ।