बजार अनुगमन : १९ व्यावसायिक फर्ममाथि कारबाही

११ भदौ, काठमाडौं । वाणिज्य, आपूर्ति तथा उपभोक्ता संरक्षण विभागले बजार अनुगमनलाई तीव्रता दिँदै बुधबार काठमाडौंका विभिन्न स्थानका १९ वटा व्यावसायिक फर्ममाथि कारबाही गरेको छ ।

अनुगमनका क्रममा उपभोक्ता संरक्षण ऐनविपरीत सञ्चालित १९ वटा व्यावसायिक फर्म कारबाहीमा परेका हुन् ।

विभागको अनुगमन टोलीले व्यवसाय दर्ता र खरिद–बिक्रीको बिलबिजक, एमआरपी जस्ता आधारभूत प्रमाणसमेत प्रस्तुत गर्न नसक्ने ७ वटा फर्मलाई तत्काल  कुल १ लाख ३१ हजार रुपैयाँ जरिबाना गरेको छ ।

कारबाहीमा पर्नेमध्ये चन्द्रागिरि नगरपालिका–११ स्थित श्री साई इन्टरप्राइजेजले सबैभन्दा बढी जरिबाना तिरेको छ । उक्त फर्मलाई ५१ हजार रुपैयाँ जरिबाना गरिएको विभागले जनाएको छ।

त्यस्तै, अन्य ६ वटा फर्म पनि कारबाहीमा परेका छन् । काठमाडौं–२६ को गुप्ता खुद्रा भण्डार र वडा नं. १६ को बिजी कलेक्सन सेन्टरलाई २०र२० हजार रुपैयाँ जरिबाना गरिएको छ ।

यस्तै वडा नं. २२ मा रहेको संकटा उपभोक्ता सहकारी संस्था लिमिटेडलाई १५ हजार रुपैयाँ, वडा नं. १६ कै तिम्सिना फेन्सी स्टोर र एनएस टेलरलाई १०/१० हजार रुपैयाँ र एबी फेन्सी कलेक्सन सेन्टरलाई ५ हजार रुपैयाँ जरिबाना गरिएको विभागले जनाएको छ ।

जरिबानाबाहेक, विभागले अन्य १२ वटा प्रतिष्ठानलाई पनि विभिन्न प्रकारले कारबाही गरेको छ । जसमध्ये ५ वटा फर्मलाई व्यवसायसँग सम्बन्धित सम्पूर्ण कानुनी कागजातसहित ३ दिनभित्र विभागमा हाजिर हुन निर्देशन दिइएको छ ।

यसरी स्पष्टीकरणका लागि बोलाइएका फर्महरूमा एन्जल सु सेन्टर, अर्बन क्लोजेट, जोशी ब्याग कलेक्सन, राजेश मोबाइल तथा घडी सेन्टर र रचना सुज सेन्टर रहेका छन् ।

यस्तै, बाँकी ७ वटा फर्मलाई अनुगमनका क्रममा देखिएका सामान्य त्रुटिहरू तत्काल सुधार गर्न सामान्य निर्देशन दिइएको छ ।

यसरी निर्देशन पाउनेमा जानकी तरकारी तथा फलफूल पसल, ब्रिअन्ड डी सुज कलेक्सन, कालिका ट्रेड लिंक, नितिषा फुड्स, ओम यूके सप्लायर्स, बेकरी डी पेरिस प्रालि, र पिंक स्पोर्ट्स रहेका छन् ।