राप्रपाले थप ८ नेताहरूलाई अनुशासनको कारबाही गर्दै

१३ भदौ, काठमाडौं । राष्ट्रिय प्रजातन्त्र पार्टी (राप्रपा) ले थप ८ जना नेतालाई अनुशासन विपरीतको गतिविधिमा कार्य गरेको भन्दै स्पष्टीकरण र कारबाहीको प्रक्रिया अघि बढाएको छ । काठमाडौं र सुर्खेतमा भएका पार्टीहित विपरीत काम गरेको भन्दै स्पष्टीकरण सोधेर कारबाही गर्ने प्रक्रिया अघि बढाइएको हो ।

राप्रपाको युवा संगठन राष्ट्रिय प्रजातान्त्रिक युवा संगठनको अधिवेशनमा हो–हल्ला गरेको भन्दै चार जनालाई स्पष्टीकरण सोधिएको छ ।

केन्द्रीय सहायक प्रवक्ता प्रविण थोकर तामाङ, पार्टीका काठमाडौं जिल्ला अध्यक्ष नवराज सिम्खडा, काठमाडौं ४ का अध्यक्ष रिद्धिप्रताप राणा र असन्तुष्ट पक्षले युवा संगठन काठमाडौंको जिल्ला अध्यक्ष बनाएका ज्योति लामालाई स्पष्टीकरण सोधिएको राप्रपा सचिवालय स्रोतले जानकारी गराएको छ । २८ साउनमा राष्ट्रिय प्रजातान्त्रिक युवा संगठन काठमाडौंको अधिवेशनमा हुलदंगा गरेको भन्दै उनीहरूलाई स्पष्टीकरण सोधिएको हो ।

‘त्यो अधिवेशन भाँड्नको लागि पार्टीसँग असम्बन्धित व्यक्तिहरू राखेर चाहिँ भेला र प्रशिक्षण गरिएको थियो । अधिवेशन स्थलमा पार्टी भन्दा बाहिरका मान्छेहरू लिएर आएर हो–हल्ला गर्ने अवरोध गदाए कार्यक्रम प्रभावित भयो,’ पार्टी अध्यक्ष राजेन्द्र लिङ्देन निकट एक नेताले भने, ‘अधिवेशन स्थगित भइसकेपछि समिति घोषणा गरेर हिँडे । स्पष्टीकरण सोधिएको  थियो । उनीहरू चारै जनाले स्पष्टीकरण दिएका छन् ।’

अनुशासन समितिको बैठक बसेर उनीहरूलाई कारबाही गरिने ती नेताले जानकारी गराए ।

रिद्धिप्रताप राणाले कार्यसम्पादन समितिमा बोलेको विषयलाई लिएर नेता ठाकुर मोहन श्रेष्ठलाई आक्रमण गरेको आरोप समेत लागेको थियो । लिङ्देन निकट ती नेताले भने, ‘त्यो बेलामा रिद्धिप्रतापलाई कारबाही गरेको थियो ।’

सुर्खेतको केन्द्रीय कार्यालय तालाबन्दी गर्न उक्साएको आरोपमा अन्य तीन नेतालाई पनि कारबाही प्रक्रिया सुरु गरिएको छ । अध्यक्ष लिङ्देनले पदमुक्त गरेका उपाध्यक्ष मुकुन्दश्याम गिरीको गृहजिल्ला सुर्खेतमा पार्टी कार्यालय तालाबन्दी गर्न उक्साएको दाबी संस्थापन पक्षले गरेको छ ।

केन्द्रीय सदस्य जनक सिंह, भिमबहादुर शाही र तालाबन्दीमा संलग्न भएकोमा युवक संगठनको नेता प्रेम बिसी र लक्ष्मी कुमारी सार्कीलाई स्पष्टीकरण सोधिएको छ ।

लक्ष्मी कुमारी सार्कीले  अनधिकृत रुपमा  कार्यसमितिको बैठक राखेको जानकारी गराइएको छ ।

‘अनुशासन समितिले स्पष्टीकरण सोधेको छ । सबै स्पष्टीकरणहरू प्राप्त भइसकेका छन् । रोशन कार्की नेतृत्वको अनुशासन समितिले कारबाही प्रक्रिया अगाडि बढाउँदै छ,’ सचिवालयले बताएको छ ।