यो साता सेयर मूल्य धेरै बढेका यी ८ कम्पनी

१३ भदौ, काठमाडौं । गत साता सेयर बजार २४ अंक अर्थात् ०.८७ प्रतिशत बढ्यो ।

गत साता २७५७ अंकमा रहेर बन्द भएको सेयर बजार यो साता २७८१ मा छ । साउन १३ गते ३००२ अंकमा पुगेको बजार भदौ ८ गते (गत आइतबार) २७३९ अंकसम्म झरेको थियो । अहिले बजार सम्हालिन खोजेको संकेत देखिएको छ ।

यो साता पहिलो दिन आइतबार १८.०२ अंक घटेको बजार सोमबार २१.३० अंक बढ्यो । मंगलबार ४.८३ अंक बढ्यो । बुधबार ५३.०१ अंक बढ्यो । बिहीबार ३८.१० अंक घट्यो ।

आइतबार ६ अर्ब ५४ करोडको कारोबार भयो । सोमबार ५ अर्ब ७५ करोड, मंगलबार ४ अर्ब १८ करोड, बुधबार ७ अर्ब ६८ करोड र बिहीबार ८ अर्ब ९ करोडको कारोबार भयो । पछिल्ला दुई दिन कारोबार रकम उल्लेख्य बढेको छ ।

दुई पुनर्बीमाका कारण अन्य समूहमा उच्च वृद्धि

यो साता अन्य समूह सबैभन्दा धेरै ४.५८ प्रतिशत बढेको छ । सो समूहमा सूचीकृतमध्ये पूँजीकरणका आधारमा ठूला दुई पुनर्बीमा कम्पनीको मूल्य उच्च दरले बढ्दा समग्र समूह बढेको हो ।

यो समूहमा ८ वटा कम्पनी सूचीकृत छन् । तीमध्ये ठूला कम्पनी नेपाल पुनर्बीमा र हिमालयन रिइन्स्योरेन्सको मूल्य उच्च दरले बढ्दा यो समूह उल्लेख्य बढ्यो । यो साता मूल्य धेरै बढेका १० कम्पनीमा नेपाल पुनर्बीमा दोस्रो र हिमालयन रिइन्स्योरेन्स चौथोमा पर्‍यो ।

जसले गर्दा अन्य समूह उचालियो । दुई पुनर्बीमा कम्पनीले माघ मसान्तसम्म चुक्ता पूँजी २० अर्ब रुपैयाँ पुर्‍याउँदैछन् । बीमा प्राधिकरणमा बुझाएको पूँजी वृद्धि योजनाअनुसार हकप्रद र बोनस सेयर जारी गरेर २०–२० अर्ब चुक्ता पूँजी पुर्‍याउँदैछन् ।

हकप्रद तथा बोनस सेयरका सूचना आउँदा मूल्य थप बढ्न सक्ने आशाले यी कम्पनीमा अहिले आकर्षण देखिएको हो ।

यो साता धेरै कारोबार भएका कम्पनी

यो साता रकमका आधारमा सबैभन्दा धेरै कारोबार भएको कम्पनी हो– हिमालयन डिस्टिलरी । सो कम्पनीको यो साता २ अर्ब ५४ करोडको कारोबार भयो ।

त्यसपछि धेरै कारोबार भएका कम्पनीमा हिमालयन रिइनस्योरेन्स, नेपाल पुनर्बीमा, पियोर इनर्जी, ग्रिन भेन्चर्स, शिवम् सिमेन्ट, बुटवल पावर, लुम्बिनी विकास बैंक, चन्द्रागिरि हिल्स र सिंगटी हाइड्रो इनर्जी क्रमशः छन् ।

कारोबार संख्यामा आधारमा पियोर इनर्जी, हिमालयन रिइन्स्योरेन्स, हिमालयन डिस्टिलरी, नेपाल पुनर्बीमा, ट्रेड टावर, विकास हाइड्रोपावर, शिवम् सिमेन्ट, सिंगटी हाइड्रो इनर्जी, नेपाल रिपब्लिक मिडिया र निफ्रा छन् ।

आईपीओ, एफपीओ तथा हकप्रद सेयर खुलेका छन् ?

यतिबेला आम सर्वसाधारणका लागि बन्दीपुर केबुलकारको आईपीओ खुलिरहेको छ । कम्पनीको ४३ लाख ४१ हजार ८० कित्ता सेयर सर्वसाधारणका लागि खुलेको हो । यो कम्पनीको आईपीओ आइतबारसम्म भर्न सकिनेछ ।

त्यस्तै वैदेशिक रोजगारमा रहेकालाई श्रीनगर एग्रिटेक इन्डस्ट्रिजको आईपीओ खुलिरहेको छ । वैदेशिक रोजगारमा रहेकालाई कम्पनीको ३ लाख ९ हजार ९३८ कित्ता सेयर खुलेको हो । छिटोमा आइतबारसम्म आवेदन दिन सकिनेछ ।

दुई कम्पनीको हकप्रद सेयरमा आवेदन खुलेको छ । जोशी हाइड्रोपावर र खानीखोला हाइड्रोपावरको हकप्रद सेयर खुलिरहेको छ । जोशीको १ बराबर ०.६५ तथा खानीखोलाको १ बराबर १ अनुपातमा हकप्रद सेयर खुलेको छ । जोशीमा भदौ १९ र खानीखोलामा भदौ २३ गतेसम्म आवेदन दिन सकिनेछ ।

विश्वका ठूला बजार उकालोतिर

विश्वका ठूला बजारमध्ये चीनको सांघाई कम्पोजिट इन्डेक्स यो साता ०.२५ प्रतिशत बढ्यो । विगत एक महिनामा यो सूचक ६.८८ प्रतिशत बढेको छ ।

अमेरिकाको डाओ जोन्स इन्डेक्स यो साता १.५२ प्रतिशत बढेको छ भने विगत एक महिनामा २.२५ प्रतिशत बढेको छ । अर्को एस एण्ड पी ५०० इन्डेक्स यो साता १.८४ प्रतिशत बढेको छ भने विगत एक महिनामा २.०६ प्रतिशत बढेको छ ।

लण्डनको एफटीएसई १०० इन्डेक्स यो साता १.२१ प्रतिशत घटेको छ भने एक महिनामा ०.६५ प्रतिशत बढेको छ ।

जापानको निक्की २२५ इन्डेक्स यो साता ०.६० प्रतिशत घट्यो भने विगत एक महिनामा ५.०३ प्रतिशत बढेको छ । भारतको बीएसई सेन्सेक्स यो साता १.८ प्रतिशत घट्यो । विगत १ महिनामा १.५२ प्रतिशत घटेको छ ।