पर्यटकीय सम्भावना बोकेको सुदूरपश्चिममा लगानी आह्वान

१३ भदौ, काठमाडौं । सुदूरपश्‍चिम पर्यटकीय दृष्टिकोणले ‘भर्जिन ल्यान्ड’ भन्दै लगानी आह्वान गरिएको छ ।

सुदूरपश्‍चिम लगानी तथा विकास सम्मेलन पूर्वसन्ध्यामा संस्कृति, पर्यटन तथा नागरिक उड्डयन मन्त्रालय र सुदूरप‍श्चिम सरकारसँगको आयोजना र नेपाल पर्यटन बोर्डको सहकार्यमा भएको पर्यटन क्षेत्रसम्बन्धी छलफल तथा अन्तक्र्रियामा पर्यटनमन्त्री बद्रीप्रसाद पाण्डेले सुदूरपश्चिमको पर्यटकीय पूर्वाधारमा लगानीका लागि आह्वान गरे ।

‘सुदूरपश्‍िचम पर्यटक आकर्षणका मुख्य आधार नेचर, कल्चर र एडभेन्चरको सम्मिश्रण भएको प्रदेश हो । सुदूरपश्चिमका थुप्रै पर्यटकीय सम्भावना उजागर भइरहेका छन्,’ मन्त्री पाण्डेले भने, ‘यस लगानी सम्मेलन मार्फत सुदूरपश्‍चिमका पर्यटकीय पूर्वाधारमा लगानी गर्न लगानीकर्तालाई आह्वान पनि गर्दछु ।’

मन्त्री पाण्डेले लगानी सम्मेलनको सम्पूर्ण आयाम मार्फत पूर्ण तयारीमा लाग्न आह्वान गरे । ‘हामीले यसका लागि निजी क्षेत्रलाई विश्‍वासमा लिने र लगानीको वातावरण सिर्जना गर्न कानुनी उल्झन समाधान गर्ने र लगानीमैत्री नीति बनाउनेतर्फ ध्यान दिनुपर्दछ,’ उनले भने ।

पर्यटन विकासका लागि सूदूरपश्‍चिममा पर्यटन बोर्डको कार्यालय यही वर्ष स्थापना गर्न बजेट विनियोजन गरिएको पनि मन्त्री पाण्डेले जानकारी गराए ।

त्यसैगरी सुदूरपश्‍िचमका मुख्यमन्त्री कमलबहादुर शाहले सुदूरपश्‍चिम सरकार निजी क्षेत्रलाई लगानीका लागि स्वागत गर्न आतुर रहेको उल्लेख गरे ।

‘हामी सुदूरपश्चिमका सम्भावनालाई लगानी सम्मेलन मार्फत राष्ट्रिय तथा अन्तर्राष्ट्रिय स्तरमा चिनाउन चाहन्छौं । यसका लागि स्वदेशका निजी क्षेत्रलाई लगानीका लागि आवश्यक कानुनी तथा लगानी सुरक्षाको ग्यारेन्टी हामी लिन तयार छौं,’ उनले भने ।

मुख्यमन्त्री शाहले लगानी सम्मेलनमा सहभागी हुन र त्यहाँका सम्भावना अध्ययन गर्दै लगानी गर्न आह्वान गरे। सुदूरप‍श्चिममा आगामी मंसिर १ र २ गते धनगढीमा लगानी सम्मेलन आयोजना हुने भएको छ ।

यसै सन्दर्भमा विभिन्न विधामा लगानीका लागि सुदूरपश्‍चिम सरकार काठमाडौं आएर विभिन्‍न निकायसँग छलफल गरिरहेको छ । शुक्रबार बिहान पर्यटन मन्त्रालयको सभाहलमा भएको अन्तक्र्रियामा सुदूरपश्चिम सरकारका तर्फबाट सुदूरपश्चिममा पर्यटकीय सम्भावना र लगानीको वातावरण स्थितिबारे प्रस्तुतीकरण गरिएको थियो ।

अन्तक्र्रिया होटल एसोसिएसन नेपाल (हान) अध्यक्ष विनायक शाह, पर्यटन बोर्डका प्रमुख कार्यकारी अधिकृत (सीईओ) दीपकराज जोशी, नाट्टाका सीईओ युबिका राजभण्डारी, एनएमएका उपाध्यक्ष ठाकुरराज पाँडे, सिद्धार्थ होटल एन्ड ग्रुप अफ कम्पनिजका सीईओ कृष्ण न्यौपाने, टानका महासचिव रामप्रसाद सेढाइँ, नेपाल उद्योग परिसंघ पर्यटन समिति सभापति पम्फा धमला, नाराका महासचिव देवराज जोशी लगायत पर्यटन सम्बद्ध निकायका प्रमुख तथा प्रतिनिधिको सहभागिता थियो ।

पर्यटन सम्बन्धी सरोकारवाला निकायका प्रमुख तथा प्रतिनिधिले सुदूरप‍श्चिममा लगानी गर्न आफूहरू तयार रहेको भए पनि सरकारले आवश्यक नीति र लगानीको क्षेत्र पहिचान गर्नुपर्ने सुझाव दिए ।

सरकारले पछिल्लो समय सुदूरप‍श्चिम र कर्णाली प्रदेशका हिमालहरूको आरोहण दुई वर्षका लागि निःशुल्क गरेको छ । सुदूरप‍श्चिममा पछिल्लो समय धनगढी विमानस्थल स्तरोन्नति र कञ्‍चनपुर विमानस्थल निर्माण अन्तिम चरणमा रहेको छ ।

छलफलमा सुदूरपश्चिम धार्मिक दृष्टिले पनि पर्यटकीय सम्भावना बोकेको क्षेत्र भएको उल्लेख गर्दै लगानीका लागि आह्वान गरिएको हो ।