को हुन् १ करोड पारिश्रमिक लिने पहिलो भारतीय अभिनेता ?

बलिउडमा सबैभन्दा धेरै पारिश्रमिक लिने अभिनेतामा शाहरूख खान, अल्लु अर्जुन, रजनीकान्त, आमिर खान, प्रभास, अक्षय कुमार र सलमान खानजस्ता थुप्रै नाम पर्छन् । तर ९० को दशकमा उनीहरू कसैले पनि करोडौँमा पारिश्रमिक लिँदैनथे ।

त्यो समयमा दक्षिण भारतीय फिल्म क्षेत्रका एक सुपरस्टारले एउटा फिल्मका लागि एक करोड भारु पारिश्रमिक लिएका थिए । उक्त ठूलो रकमसहित उनी सन् १९९० को दशकमा सबैभन्दा धेरै पारिश्रमिक लिने पहिलो अभिनेता बनेका थिए ।

ती अभिनेता अरू कोही नभएर चिरञ्जीवी हुन् । सन् १९९२ मा रिलिज भएको फिल्म ‘आपदबन्धभुदु’मा अभिनय गरेबापत उनले १ करोड २५ लाख भारु पारिश्रमिक लिएको भारतीय सञ्चार माध्यमहरूमा उल्लेख छ । यसरी उनी भारतमा सबैभन्दा धेरै पारिश्रमिक लिने र एक करोड पारिश्रमिक लिने पहिलो भारतीय अभिनेता बनेका थिए ।

त्यो समयमा ‘द विक’ नामक पत्रिकाले चिरञ्जीवीको तस्बिर राख्दै ‘बिगर देन बच्चन’ (बच्चनभन्दा ठूलो) भन्ने हेडलाइनसहित कभर पेजमा छापेको थियो । जीक्यू इन्डियाका अनुसार त्यस बेलासम्म अमिताभ बच्चनले प्रतिफिल्म ९० लाखभन्दा कम लिने गर्थे । अनि ‘खुदा गवाह’ नामक फिल्ममा खेलेपछि उनी अभिनयबाट केही समय टाढा रहेका थिए । त्यसले पनि चिरञ्जीवीले पुरस्कार विजेता फिल्म ‘आपदबन्धभुदु’का लागि १ करोड पारिश्रमिक लिएको अप्रत्यक्ष तरिकाले पुष्टि गर्छ ।

त्यसपछि सन् १९९६ मा मात्र बच्चन फिल्म क्षेत्रमा फर्केका थिए । उनले ‘मृत्युदाता’ फिल्मबाट १ करोड पारिश्रमिक लिएका थिए । यसरी एक करोड पारिश्रमिक लिने उनी पहिलो बलिउड अभिनेता बनेका थिए । त्यसपछिका वर्षहरूमा शाहरूख खान, सलमान खान र आमिर खानले २-३ करोड रुपैयाँ पारिश्रमिक लिन थालेका थिए ।

एउटा फिल्मका लागि १ करोड पारिश्रमिक लिने पहिलो भारतीय अभिनेत्री श्रीदेवी थिइन् । उनले सन् १९९३ को फिल्म ‘रूपकी रानी चोरोका राजा’का लागि उक्त पारिश्रमिक लिएकी थिइन् । त्यो समयमा श्रीदेवीको पारिश्रमिक महत्त्वपूर्ण कोसेढुङ्गा थियो । किनभने सामान्यतया पुरुष अभिनेताहरूले मात्र यति धेरै रकम लिइरहेका थिए ।

चिरञ्जीवीले सन् १९७८ मा आफ्नो अभिनय यात्रा सुरु गरे पनि सन् १९८३ को फिल्म ‘कैदी’बाट सफलता हासिल गरेका थिए । उनले तेलुगु सिनेमामा सबैभन्दा धेरै ‘इन्डस्ट्री हिट्स’ को कीर्तिमान राखेका छन् । जसमा उनका ८ वटा फिल्म त्यस समयका सर्वाधिक कमाउने फिल्म हुन् ।

उनलाई भारत सरकारबाट सन् २००६ मा पद्म भूषण र सन् २०२४ मा पद्म विभूषणसहित थुप्रै पुरस्कारले सम्मान गरिएको छ । उनले सन् २०२२ मा ‘आईएफएफआई इन्डियन फिल्म पर्सनालिटी अफ द इयर अवार्ड’ पनि प्राप्त गरेका छन् ।

उनका अन्य सम्मानहरूमा रघुपाथी वेंकैया पुरस्कार, तीन नन्दी पुरस्कार र नाइन फिल्मफेयर अवार्ड साउथ रहेका छन् । सन् २०२४ मा उनलाई भारतीय फिल्म उद्योगमा सबैभन्दा बढी अभिनय गरेका अभिनेता-नर्तकको रूपमा गिनिज वर्ल्ड रेकर्डले सम्मान गरेको थियो ।

उनका उल्लेखनीय कामहरूमा पसिवादी प्राणम (१९८७), यामुदिकी मोगुडु (१९८८), अत्ताकु यामुडु अम्मायिकी मोगुडु (१९८९), जगदेका वीरुडु अतिलोका सुन्दरी (१९९०), ग्याङ लिडर (१९९१), घराना मोगुडु (१९९२) लगायतका फिल्महरू रहेका छन् ।