पीडितको उजुरी आए गिरीबन्धु जग्गा प्रकरणको फाइल खुल्छ : गृहमन्त्री

२७ असोज, काठमाडौं । गृहमन्त्री ओमप्रकाश अर्यालले पीडितहरूको उजुरी आए झापाको गिरीबन्धु टि स्टेटको जग्गा प्रकरणसम्बन्धी फाइल खुल्ने जानकारी दिएका छन् ।

उनले अहिलेको राज्य संयन्त्रमा यस्ता काम गर्न कुनै अवरोध नरहेको उल्लेख गरे । सोमबार साँझ मन्त्रालयबाट बाहिरिने क्रममा सञ्चारकर्मीसँग कुरा गर्दै गृहमन्त्री अर्यालले यससम्बन्धिस उजुरी अख्तियार वा प्रशासनमा आउनुपर्ने बताए ।

‘पहिले उजुरी आउनुपर्‍यो । उजुरी अख्तियारमा पनि आउनुपर्‍यो । प्रहरी प्रशासनमा पनि आउनुपर्‍यो’ उनले भने,’कोही ठगिएका छन् भने प्रहरी प्रशासनमा आएपनि हुन्छ । अथवा हाम्रो नोटिसमा लिखित रुपमा ल्याइदिनुभयो भने पनि हुन्छ ।’

उनले मन्त्रीले चाहीँ उजुरी हाल्दै नहिँड्ने बताए । ‘कोही नागरिकले जग्गाका लागि बैना दिनुभएको छ,पीडित हुनुहुन्छ कि ? बैना पनि संकलन गरियो । त्यही बैना सायद रिसवतको रुपमा पनि प्रयोग भयो कि ? त्यही बैना वापतको पैसा निर्णय गराउने प्रक्रियामा खर्च गरियो कि ?’ गृहमन्त्री अर्यालले भने- ‘यो कुरा त जसले देखेको भोगेको मान्छे वा पीडित भएको मान्छे हो उसले राज्य संयन्त्रमा ल्याइदिनुपर्‍यो ।’

उनले उजुरी आए राज्य संयन्त्रले बिना अवरोध छानबिन अघि बढाउने जानकारी दिए ।

गिरीबन्धु टी इस्टेटले चिया बगानका लागि हदबन्दी भन्दा बढीको जग्गा सट्टापट्टा गर्ने सम्बन्धी प्रकरण हो । भूमिसम्बन्धी कानून संशोधन गरेर जग्गा सट्टाभर्ना सम्बन्धी निर्णय भएको थियो । यो प्रकरणका फाइल खुले केपी शर्मा ‌ओली पनि तानिन सक्छन् । बिर्तामोड र अर्जुनधारा नगरपालिकामा पर्ने यो जग्गा बिक्री गर्न बिचौलियाहरुले बैना संकलन गरेका थिए ।

यो प्रकरणलाई उधिन्न कानुन ब्यबसायी रहेका बखत अर्यालले नेतृत्वदायी भूमिका खेलेका थिए । उनैले दायर गरेको मुद्दामा फैसला गर्दै सर्वोच्च अदालतले ओली सरकारको निर्णय खारेज गरिदिएको थियो ।

यो पनि पढ्नुहोस

सर्वोच्चले रोक्यो गिरी बन्धुको प्लटिङ गर्ने शृंखलाबद्ध प्रपञ्च

यो पनि पढ्नुहोस

गिरीबन्धुबारे ओलीका तीन गल्ती

यो पनि पढ्नुहोस

प्रधानमन्त्रीले छानबिन गर्ने भनेको ‘गिरीबन्धु टी इस्टेट’ प्रकरण के हो ?