गृहमन्त्रीसँग भेटेर निर्माण व्यवसायीले मागे शान्ति सुरक्षा

२ कात्तिक, काठमाडौं । निर्माण व्यवसायी महासंघका प्रतिनिधिहरूले गृहमन्त्री ओमप्रकाश अर्याललाई भेटेका छन् ।

नेपाल निर्माण व्यवसायी महासंघका अध्यक्ष रवि सिंहको नेतृत्वमा गएको प्रतिनिधिमुलक टोलीले आज गृहमन्त्री अर्याललाई भेटेको हो । भेटमा निर्माण उद्योगलाई चलायमान गराउने विषयमा छलफल भएको छ ।

निर्माणजन्य कार्यमा असुरक्षाको महशुस हुने वातावरण भएको भन्दै व्यवसायीहरुले ढुक्कसँग काम गर्नसक्ने वातावरण मिलाउन आग्रह गरेका छन् । नेपाल निर्माण व्यवसायी महासंघका अध्यक्ष सिंहले भेटबारे जानकारी दिँदै दीपावली पछि निर्माणका काममा तीव्रता दिन लागिएको र उश्रृङ्खल तत्वबाट बाधाअड्चन खडा गर्ने भएकाले सुरक्षाको प्रत्याभुति मिलाउन गृहमन्त्रीको ध्यानाकर्षण गराइएको बताए ।

‘दिपावलीपछि निर्माणको काम तीव्रता दिँदैछौं । उश्रृंखल तत्वबाट अवरोध खडा गर्नसक्ने भएकाले गृहमन्त्रीको ध्यानाकर्षण गरायौँ । हामीले कार्यक्षेत्रमा गएर काम गर्नका लागि शान्ति सुव्यवस्था हुनपर्‍यो भनेर गृहमन्त्रीसँग माग गरेका छौं । गृहमन्त्रीले शान्ति सुरक्षाको पूर्णरुपमा अनुभुति हुनेगरी दिलाउने बताउनु भयो,’ उनले भने ।

अध्यक्ष सिंहकाअनुसार शान्ति सुरक्षाका लागि कुनै कसर बाँकी नराख्ने गृहमन्त्रीले भेटका क्रममा बताए । व्यवसायीहरूले कामका क्रममा भोग्नुपरेका कानूनी अड्चनका, समस्याबारेमा समेत गृहमन्त्रीसमक्ष जानकारी गराएका थिए ।