तीव्र हावाहुरीले न्युजिल्यान्डमा जनजीवन अस्तव्यस्त, सयौँ उडान रद्द

६ कात्तिक, काठमाडौँ। न्युजिल्यान्डमा तीव्र गतिको हावाहुरीका कारण अवस्था गम्भीर बनेको छ। प्रशासनले नागरिकहरूलाई घरभित्रै बस्न अपिल गरेको छ ।

बीबीसीका अनुसार न्युजिल्यान्डको दक्षिणी र मध्य भागमा प्रतिघण्टा १ सय ५५ किलोमिटरसम्मको रफ्तारले चलेको हावाहुरीले व्यापक क्षति पुर्‍याएको छ ।

कस्तो छ क्षतिको अवस्था ? 

• विद्युत अवरुद्ध : करिब ९० हजार घरको विद्युत् आपूर्ति ठप्प भएको छ ।
• उडान रद्द : १ सयभन्दा बढी आन्तरिक र अन्तर्राष्ट्रिय उडान रद्द गरिएका छन् ।
• प्रभावित क्षेत्र : राष्ट्रिय मौसम सेवाका अनुसार क्यान्टरबरी, वेलिङटन, नेल्सन र मार्लबोरो क्षेत्रमा हावाहुरीको सबैभन्दा बढी असर देखिएको छ ।
• यातायात अवरोध : धेरैजसो क्षेत्रमा रुख र बिजुलीका पोलहरू उखेलिएका छन्, जसका कारण सडक बन्द हुनुका साथै रेल सेवाहरू पनि प्रभावित भएका छन् ।

सरकारले के भन्यो ?

• सरकारले प्रभावित क्षेत्रहरूमा ‘रेड विन्ड वार्निङ’ जारी गरेको छ, जुन न्युजिल्यान्डको सबैभन्दा गम्भीर मौसम चेतावनी श्रेणी हो ।
• दक्षिणी टापुका पहाडी इलाकाहरूमा भारी वर्षा र पहिरोको सम्भावना पनि व्यक्त गरिएको छ ।
• आपतकालीन व्यवस्थापन मन्त्रालयले नागरिकहरूलाई घरमै बस्न, अनावश्यक यात्रा नगर्न र आपतकालीन किट तयार राख्न सल्लाह दिएको छ ।

वेलिङटनका मेयर टोरी व्हानौले भनिन्, ‘हामीले यस्तो हावाहुरीको सामना गरिरहेका छौं, जुन दशकौंमा एक पटक आउँछ, हाम्रा टोलीहरू सडक र बिजुलीका लाइनहरू सफा गर्न जुटेका छन्, तर यसमा समय लाग्ने छ ।’