झुन्डिएकै अवस्थामा सडेको थियो गंगाको शव, भाइटीकाकै दिन भेटियाे जंगलमा

६ कात्तिक, काठमाडौं । रुकुमपश्चिमको मुसिकोट नगरपालिका–१३ डाँडाछिवाङकी एक युवती मृत अवस्थामा फेला परेकी छन् । असोज २० गतेदेखि बेपत्ता रहेकी २५ वर्षीया गंगा सार्की बिहीबार बिहान गाउँ नजिकैको जंगलमा झुन्डिएको अवस्थामा भेटिएकी हुन् ।

जिल्ला प्रहरी कार्यालय रुकुम पश्चिमका सूचना अधिकारी हरिप्रसाद पुनका अनुसार बिहान जंगल गएका स्थानीयले दुर्गन्ध आएपछि खोजी गर्ने क्रममा रूखमा झुन्डिएको शव देखेपछि प्रहरीलाई जानकारी गराएका थिए ।

‘शव सडेको अवस्थामा फेला परेको छ,‘ प्रहरी निरीक्षक पुनले भने , ‘बेपत्ता भएको दिनकै राति वा भोलिपल्ट नै घटना भएको देखिन्छ ।’

शवको मुचुल्का उठाइसकेको र शवलाई पोस्टमार्टमका लागि जिल्ला अस्पताल, सल्ले पुर्‍याएको उनले बताए ।

घटनाबारे थप अनुसन्धान प्रक्रिया प्रहरीले अघि बढाएको छ ।

गंगा असोज २० गते साँझ करिब ५ बजे घाँस काट्न भनेर घरबाट निस्किएकी थिइन् । त्यसपछि उनी सम्पर्कविहीन भएकी थिइन् ।

गंगाको माइतीघर रुकुम पूर्व सिस्ने गाउँपालिका–८ मा पर्छ । परिवारका अनुसार गंगाले बेपत्ता हुनुअघि भारतमा रहेका श्रीमानसँग अन्तिम पटक फोनमा कुरा गरेकी थिइन् ।

सो क्रममा सामान्य विवाद भएको पारिवारिक स्रोतको भनाइ छ ।

(रुकुमपूर्वबाट बलराम शेर्पालीको सहयोगमा)