नर्सको आन्दोलनलाई संघको ऐक्यबद्धता, दुई घण्टा सेवा ठप्प

फाइल फोटो ।

News Summary

Generated by OK AI. Editorially reviewed.

निजी अस्पताल तथा शिक्षण संस्थामा कार्यरत नर्सहरूले सरकारी सरह सेवा–सुविधा पाउन १५ बुँदे माग सहित आन्दोलन गरिरहेका छन्।
नेपाल नर्सिङ संघको आह्वानमा बुधबार दुई घण्टा अत्यावश्यक बाहेकका सेवा ठप्प पारिएको छ ।
स्वास्थ्य मन्त्रालयले नर्सहरुको न्यूनतम पारिश्रमिक सरकारीसरह लागू गर्न आग्रह गरे पनि निजी संस्थाले कार्यान्वयन नगरेको गुनासो छ।

१२ कात्तिक, काठमाडौं । निजी स्वास्थ्य संस्थामा कार्यरत नर्सहरू केही दिनदेखि आन्दोलित छन् । सरकारीसरह सेवा सुविधा पाउनुपर्ने माग राख्दै निजी अस्पताल तथा शिक्षण संस्थामा कार्यरत नर्सहरू आन्दोलन गरिरहेका छन् ।

नेपाल नर्सिङ संघले आन्दोलनमा ऐक्यबद्धता जनाउँदै बुधबार दुई घण्टा अत्यावश्यक बाहेकका सम्पूर्ण सेवा ठप्प पारेको छ । संघको आह्वानमा देशभरका सरकारी तथा निजी अस्पताल तथा शिक्षण संस्थाहरुमा कार्यरत नर्सहरूले सेवा ठप्प पारेका हुन् ।

नर्सहरूले सेवा बन्द गरी आ-आफ्ना संस्थाको प्रांगणमा भेला भएर बिहान १० बजेदेखि १२ बजेसम्म प्रदर्शन गरेका थिए । सरकारी सरह पारिश्रमिक पाउनुपर्ने सहित नर्सिङ पेशाको हकहितका विषयमा १५ बुँदे माग राखेका छन् ।

स्वास्थ्य तथा जनसङ्ख्या मन्त्रालयले नर्सिङ तथा स्वास्थ्यकर्मीको न्यूनतम पारिश्रमिक र सेवा सरकारी सरह नघट्ने गरी लागू गर्न आग्रह गरिसकेको छ । सरकारले यस्तो आग्रह पहिले पनि गरेको तर निजी अस्पताल तथा शिक्षण संस्थाहरूले कार्यान्वयन नगरेको गुनासो नर्सहरूको छ । सरकारीसरह पारिश्रमिक सहित सबै माग कार्यान्वयन नभएसम्म आन्दोलन नरोक्ने अडान नर्सहरूको छ ।