जसपा नेपालले भन्यो- पाँचकुने तारा अन्य दलले दाबी नगरुन्

१८ कात्तिक, काठमाडौं । जनता समाजवादी पार्टी नेपालले आफ्नो पार्टीको झण्डामा अंकित पाँचकुने तारा अन्य दलले चुनाव चिह्न दाबी गर्न नपाउने भनेको छ ।

पार्टीका प्रवक्ता मनिष सुमनले विज्ञप्ति निकालेर यस्तो बताएका हुन् ।

नेकपा माओवादी केन्द्र, नेकपा एकीकृत समाजवादी सहितका ९ वटा दल र समूहबीच एकतापछि पार्टीको नाम नेपाली कम्युनिस्ट पार्टी राख्ने तयारी छ । यस्तो प्रस्ताव माओवादी केन्द्रको बैठकबाट पारित भइसकेको छ ।

तर, जसपा नेपालले विज्ञप्ति निकालेर राजनीतिक दल सम्बन्धी ऐन २०७३ को दफा ६ (१) (ङ), दफा (९), दफा ५४ (७) (क) विपरीत आफ्नो पार्टीको झण्डामा रातो पृष्ठभूमिमा अंकित पाँच कुने तारालाई अन्य कुनै राजनीतिक दलले आफ्नो चुनाव चिह्र दाबी गर्न नपाउने बताएको हो ।

यो पनि पढ्नुहोस

प्रचण्ड-माधवहरूको चुनाव चिह्न तारा

‘जनता समाजवादी पार्टी, नेपालको झण्डामा प्रयोग गरी आएको उक्त पाँच कुने तारा चिन्ह अन्य कुनै राजनीतिक दललाई निर्वाचन चिन्ह वा अन्य चिन्हको रूपमा प्रयोग नगर्न हुन आग्रह गर्दछौं,’ विज्ञप्तिमा उल्लेख छ ।

साथै यस सम्बन्धमा निर्वाचन आयोगसमेतको ध्यानाकर्षण गराउने जसपा नेपालले बताएको छ ।