‘ऊनको स्विटर’ दक्षिण भारतमा पनि प्रदर्शन हुने

News Summary

Generated by OK AI. Editorially reviewed.

फिल्म 'ऊनको स्विटर' २०८२ सालको अहिलेसम्म धेरै कमाउने तेस्रो नेपाली फिल्म हो।
यो फिल्म भारतका विभिन्न शहरहरूमा प्रदर्शन भइरहेको छ, जसमा मुम्बई, हैदराबाद, सिमला, धर्मशाला, सिलोङ र अरुणान्चल प्रदेशका सहरहरू समावेश छन्।
निर्देशक नवीन चौहानले यसले नेपाली फिल्मको नयाँ बजार र अन्तर्राष्ट्रिय उपस्थितिको ढोका खोलिदिएको बताए।

काठमाडौं । विपिन कार्की स्टारर फिल्म ‘ऊनको स्विटर’ २०८२ सालको अहिलेसम्म धेरै कमाउने तेस्रो नेपाली फिल्म हो । यो फिल्म गतसातादेखि भारतमा रिलिज भएको छ ।

नेपाली भाषी बहुल पूर्वोत्तर भारतमा रिलिज भैसकेको यो फिल्म भारतका अन्य ठाउँमा समेत प्रदर्शनमा आउने भएको छ । १२ डिसेम्बरदेखि मुम्बई, हैदराबाद, हिमाञ्चलको सिमला, धर्मशाला, कुल्लु, अरुणान्चल प्रदेशका तेजू रनामसाई, मेघालयको सिलोङ तथा असामका अन्य सहरहरूमा पनि प्रदर्शन हुनेछ ।

निर्माता कम्पनी आर्टमाण्डूले विज्ञप्तिमार्फत यसबारे जानकारी दिएको छ ।

आसामको गुवाहाटी, पश्चिम बंगालको कोलकाता, उत्तराखण्डको देहरादून, राजधानी नयाँ दिल्ली, बैंगलोर र हैदरावादमा भने रिलिज भैसकेको छ । बैंंगलोरमा नेपाली भाषीको जनसंख्या न्यून रहे पनि त्यहाँका ४ प्रमुख हलमा भने फिल्मले राम्रो ब्यापार गरिरहेको निर्माताले जनाएका छन् ।

निर्देशक नवीन चौहानले गान्तोकबाट सुरु भएको यात्रा दक्षिण भारतसम्म पुग्नु महत्वपूर्ण उपलब्धि भएको बताए । नेपाली भाषाबाहेकका दर्शकबाट समेत फिल्मप्रतिको रुचि बढ्दो क्रममा रहेको उल्लेख गर्दै उनले यसले नेपाली फिल्मको नयाँ बजार र अन्तर्राष्ट्रिय उपस्थितिको ढोका खोलिदिएको बताए ।

यो फिल्मलाई भारतमा एसली प्रोडक्सन र एवन राईको समूहले रिलिज गरेको हो ।