ट्रान्सपरेन्सी इन्टरनेशनलले भन्यो- सरकारका १०० कार्यसूची भ्रष्टाचार नियन्त्रणको प्रशंसनीय सुरुवात

News Summary

Generated by OK AI. Editorially reviewed.

ट्रान्सपरेन्सी इन्टरनेशनल नेपालले सरकारले सार्वजनिक गरेको १०० वटा शासकीय सुधार कार्यसूची भ्रष्टाचार नियन्त्रणका लागि प्रशंसनीय सुरुवात भएको बताएको छ।
अध्यक्ष मदनकृष्ण शर्माले नवगठित सरकारले पारित गरेको कार्यसूची जनादेशको भावना र सुशासनका विषयहरू समावेश भएको विज्ञप्तिमा उल्लेख गर्नुभयो।
सरकारले पहिलो बैठकमा समय सीमा सहितको बृहत कार्यसूची पारित गरी जनताको हित र सुशासनप्रतिको प्रतिबद्धता देखाएको विज्ञप्तिमा भनिएको छ।

१७ चैत, काठमाडौं । ट्रान्सपरेन्सी इन्टरनेशनल नेपालले सरकारले सार्वजनिक गरेको शासकीय सुधारका लागि १०० वटा कार्यसूची भ्रष्टाचार नियन्त्रणका लागि प्रशंसनीय सुरुवात भएको बताएको छ ।

ट्रान्सपरेन्सी इन्टरनेशनल नेपालका अध्यक्ष मदनकृष्ण शर्माले मंगलबार विज्ञप्ति जारी गर्दै यस्तो बताएको हो ।

नवगठित सरकारले पारित गरेको शासकीय सुधारसम्बन्धी कार्यहरूको सूची जनादेशको भावना र माग अनुरूप हुनुका साथै धेरै वर्षदेखि उठाइँदै आइएका सुशासनका विषयहरू अधिकांश रूपमा समावेश भएको ट्रान्सपरेन्सी इन्टरनेशनल नेपालले जारी गरेको विज्ञप्तिमा उल्लेख छ ।

पहिलो बैठकमा नै देशलाई सुशासनतर्फ लान समय सीमा सहितको बृहत कार्यसूची पारित गर्नुले बालेन शाह नेतृत्वमा रहेको सरकारले जनताको हित र सुशासनप्रतिको प्रतिबद्धता देखाएको उल्लेख छ ।

‘बृहत कार्यसूचीमा उल्लेखित कार्यहरुको कार्यान्वयनको सुरुवात भइसक्नु सह्रानीय छ । तोकिएको समय सीमाभित्र सबै कार्यहरू सम्पन्न हुनेछन् भन्नेमा आशा र विश्वास लिएका छौं । सुशासन प्रवर्द्धनको कार्यमा आफ्नो अनुभव र विज्ञता उपलब्ध गराउन ट्रान्सपरेन्सी इन्टरनेशनल नेपाल प्रतिबद्ध छ,’ विज्ञप्तिमा भनिएको छ ।