सिक्री लुटपाटमा संलग्न रहेको आरोपमा तीन जना पक्राउ

News Summary

Generated by OK AI. Editorially reviewed.

धनकुटाको मदन चोकबाट विष्णुमाया राईको सुनको गहना चोरी गरी फरार तीन जनालाई धरानबाट पक्राउ गरिएको छ।
पक्राउ पर्नेमा सिन्धुलीको दुधौली नगरपालिका-६ का धनबहादुर तामाङ, प्रेमलाल घिसिङ र राजु तामाङ रहेका छन्।
प्रहरीले चोरीमा प्रयोग भएको दुई मोटरसाइकल र सुनका विभिन्न गहनासहित पक्राउ परेकाहरूलाई धनकुटामा ल्याएर अनुसन्धान गरिरहेको छ।

२८ वैशाख, धनकुटा । धनकुटाको मदन चोकबाट सुनको गहना चोरी गरी फरार भएको आरोपमा तीन जना पक्राउ परेका छन् ।

धनकुटाको सहिदभूमि गाउँपालिका-१ की ४० वर्षकी विष्णुमाया राईको सुनको गहना चोरेर फरार भएका आरोपमा धरानबाट तीन जना पक्राउ परेका हुन् ।

जिल्ला प्रहरी कार्यालय धनकुटाका प्रहरी नायब उपरिक्षक ज्ञानकुमार महतोका अनुसार पक्राउ पर्नेमा सिन्धुलीको दुधौली नगरपालिका-६ का ३० वर्षका धनबहादुर भन्ने दानबहादुर तामाङ, ३३ वर्षका सन्तोष भन्ने प्रेमलाल घिसिङ र वर्ष ३८ का राजु तामाङ रहेका छन् ।

प्र ३–०२–०१३ प ८००१ नम्बरको मोटरसाइकल र बा ८२ प ९५६४ नम्बरको मोटरसाइकलमा सवार उनीहरूले धनकुटा नगरपालिका-७ मदन चोकबाट राईको घाँटीमा रहेको १ तोला २ आनाको सुनको सिक्री लुटेर गत शुक्रबार फरार भएका थिए ।

राईले जिल्ला प्रहरी कार्यालय धनकुटामा दिएको उजुरीको आधारमा तीनै जनालाई सुनसरीको धरान उप महानगरपालिका- ८ स्थित एक होटलबाट पक्राउ गरिएको प्रहरीले जनाएको छ ।

पक्राउ परेकाहरुलाई धनकुटा ल्याएर थप अनुसन्धान भइरहेको जिल्ला प्रहरी कार्यालय धनकुटा ल्याइएको प्रहरी नायब उपरिक्षक महतोले जानकारी दिए।

उनीहरूको साथबाट प्रहरीले सुन जस्तो देखिने पहेंलो धातुको लकेटसहितको सिक्री १ थान, लकेट बिनाको सिक्री १ थान, सिक्रीको लकेट मात्र १ थान, तिलहरी १ थान, कानको बेरुवा कुण्डल १ थान र बेरुवा औंठी १ थान बरामद गरेको छ ।

यस्तै प्र ३–०२–०१३ प ८००१ नम्बरको बुलेट मोटरसाइकल र बा ८२ प ९५६४ नम्बरको एनएस मोटरसाइकल पनि बरामद गरेको छ ।