युक्रेनमाथि आक्रमणयता पहिलोपटक रुसमा दुई ठूला कन्सर्ट गर्दै कान्ये वेस्ट

न्यूयोर्क । विगतमा कान्ये वेस्टका नामले चिनिने अमेरिकी र्‍यापर येले यस शरद ऋतुमा रुसको सेन्ट पिटर्सबर्गमा दुई ठूला स्टेडियम कन्सर्ट गर्ने भएका छन् । आयोजकले सोमबार दिएको जानकारीअनुसार, चार वर्षअघि रुसले युक्रेनमाथि आक्रमण गरेयता कुनै प्रमुख पश्चिमा कलाकारले रुसमा गर्न लागेको यो पहिलो कन्सर्ट हुनेछ ।

कन्सर्ट अक्टोबर १० र ११ मा सेन्ट पिटर्सबर्गको सबैभन्दा ठूलो स्टेडियम गाजप्रोम एरिनामा आयोजना हुनेछ । पछिल्ला वर्षहरूमा संगीतभन्दा यहुदीविरोधी र नाजी समर्थक अभिव्यक्तिका कारण बढी चर्चामा रहेका येमाथि जारी विवादकै बीच कन्सर्ट हुन लागेको हो ।

कन्सर्टलाई रुसभित्रै पनि विरोध हुन सक्ने देखिएको छ । त्यहाँका धेरै रूढिवादी अभियन्ताले रुसले पश्चिमा संस्कृतिका बाँकी प्रभावसमेत हटाउनुपर्ने तर्क गर्दै आएका छन् ।

रुसका रूढिवादी सांसद भिटाली मिलोनोभले येले रुसमा घुलमिल हुन परम्परागत रुसी गीत गाउनुपर्ने सुझाव दिएका छन् । भिडियो वक्तव्यमा मिलोनोभले भनेका छन्, ‘सायद यसपछि उनले आफ्ना घृणित हर्कत बन्द गर्नेछन् र सामान्य व्यक्ति बन्नेछन् ।’

यद्यपि, कन्सर्टको घोषणाले प्रशंसकमा ठूलो उत्साह देखिएको छ । कन्सर्टको वेबसाइटअनुसार, १,८५० अमेरिकी डलरभन्दा बढी मूल्यका सबैभन्दा महँगा टिकटमध्ये लगभग सबै सोमबार घोषणा भएको केही घण्टामै बिक्री भए । करिब १०५ डलर मूल्यका सबैभन्दा सस्ता टिकट पनि रुसमा साँझसम्म सबै बिक्री भइसकेका थिए ।

सेन्ट पिटर्सबर्गको प्रमुख होटल हेल्भेट्सियाका मालिक युनिस तेइमुर्खान्लीले कन्सर्ट घोषणा भएपछि बुकिङ, फोन र सन्देशको ‘विस्फोट’ भएको बताए । टेलिग्राम मेसेजिङ एपमा उनले लेखेका छन्, ‘मेरो सम्पूर्ण एड्रेस बुक एकैपटक सक्रिय भयो ।’

अमेरिकी र्‍याप स्टारहरूले लामो समयदेखि रुसमा कन्सर्ट गर्दै आए पनि सन् २०२२ को फेब्रुअरीमा रुसले युक्रेनमाथि पूर्ण स्तरको आक्रमण सुरु गरेपछि उनीहरूका अधिकांश कन्सर्ट रोकिएका थिए ।

युद्धका कारण रुसमाथि पश्चिमा देशले प्रतिबन्ध लगाएको भए पनि डाबेबी र टाइगाजस्ता केही पश्चिमा कलाकारले गत वर्ष मस्कोमा प्रस्तुति दिएका थिए । जेसन डेरुलोले यसै गर्मीमा त्यहाँ प्रस्तुति दिएका थिए ।

येले रुसमा कन्सर्ट गर्ने चर्चा केही समयदेखि चल्दै आएको थियो । पछिल्लोपटक सन् २०२४ मा उनी एक रुसी फेसन डिजाइनरको जन्मदिनको पार्टीमा सहभागी भएका थिए ।

ये अप्रिलमा लस एन्जलसमा पाँच वर्षपछि अमेरिकामा आफ्नो पहिलो पूर्ण लाइभ शो गर्दै सफलतापूर्वक प्रत्यक्ष प्रस्तुतिमा फर्किएका थिए । तर यस वर्षको सुरुवातमा यहुदीविरोधी व्यवहारका लागि माफी मागे पनि पछिल्ला महिनामा युरोप भ्रमण गर्ने उनका प्रयासले विगतका यहुदीविरोधी र नाजी समर्थक अभिव्यक्तिका कारण विवाद निम्त्याएका छन् ।

अप्रिलमा बेलायत सरकारले लन्डनको एक प्रमुख महोत्सवमा मुख्य कलाकारका रूपमा प्रस्तुति दिन येको देश प्रवेशमा रोक लगाएको थियो । उनको उपस्थिति ‘सार्वजनिक हितका लागि अनुकूल नहुने’ बेलायत सरकारको भनाइ थियो ।

त्यसयता यस्तै विवादबीच फ्रान्स, इटाली र पोल्यान्डमा उनका कन्सर्ट रद्द भएका छन् । तर येले नेदरल्यान्ड्स, टर्की र अल्बानियामा ठूला कन्सर्ट गरेका छन् । यसले युरोपभर अभिव्यक्ति स्वतन्त्रताप्रतिको फरक दृष्टिकोणलाई देखाएको छ ।येका अमेरिकामा पनि तीनवटा आगामी कन्सर्ट तय भएका छन् । यसै महिनाको अन्त्यतिर सुरु हुने ती कन्सर्ट सिकागो र न्यु अर्लिन्समा हुनेछन् ।