एआईको विकास केही समयका लागि सुस्त गर्ने प्रस्तावमा साम अल्टम्यानको समर्थन

ओपनएआईका प्रमुख कार्यकारी अधिकृत साम अल्टम्यानले सबैभन्दा उन्नत एआईको विकास केही समयका लागि सुस्त बनाउनुपर्ने प्रस्तावलाई समर्थन गरेका छन् ।

साथै उनले मानवताको सुरक्षा आवश्यक परे ओपनएआईले आफ्ना सबै जीपीयू पगाल्न समेत तयार रहेको समेत बताएका हुन् । यद्यपि यो अवस्था आउने कुरा एउटा हाइपोथेसिस मात्र रहेको उनले बताएका छन् ।

अल्टम्यानले एन्थ्रोपिकका प्रमुख कार्यकारी अधिकृत डारियो अमोडेईको प्रस्तावमा समर्थन जनाएका हुन् । अमोडेईले सबैभन्दा उन्नत एआईको विकासमा केही समयका लागि गति घटाएर यसको सुरक्षा सुनिश्चित गर्नुपर्ने बताएका थिए ।

अल्टम्यानले यो कुरा फर्च्युनसँगको अन्तर्वार्तामा बताएका हुन् ।

स्वतन्त्र संस्थाबाट सुरक्षा परीक्षण

अल्टम्यानले ओपनएआईले आफ्ना एआई प्रणालीको सुरक्षा जाँच स्वतन्त्र संस्थाबाट गराउने पनि बताएका छन् । त्यस्ता संस्थालाई कम्पनीका कर्मचारीलाई जस्तै आवश्यक जानकारी र पहुँच दिइने प्रतिबद्धता उनको छ ।

स्वतन्त्र जाँचकर्ताले ओपनएआईका एआई प्रणालीबाट मानिसलाई जोखिम हुन सक्छ कि सक्दैनन् र कम्पनीले जोखिम रोक्न पर्याप्त काम गरिरहेको छ कि छैन भन्ने जाँच गर्नेछन् ।

‘जीपीयू पगाल्ने’ भन्नुको अर्थ

एआई सिस्टम बनाउन र सञ्चालन गर्न जीपीयू आवश्यक पर्छ । जीपीयूले ठूलो मात्रामा सूचना प्रशोधन गर्न मद्दत गर्छन् ।

त्यसैले अल्टम्यानले ‘सबै जीपीयू पगाल्न छौँ’ भन्नुको अर्थ जोखिम धेरै बढेमा ओपनएआईले एआईकाे तीव्र विकास रोक्न आफ्नो कम्प्युटर प्रणालीसमेत बन्द गर्न तयार रहेको जनाउनु हो ।

अल्टम्यानले एआईको सुरक्षा र मानिसको हित सुनिश्चित गर्न एकपटक मात्र होइन, आवश्यक परे पटकपटक विकासको गति घटाउनुपर्ने हुन सक्ने पनि बताएका छन् ।