आचारसंहिताको धज्जी : प्रचार सामग्रीले भरियो कांग्रेस महाधिवेशनस्थल (फोटो फिचर)

२२ असोज, काठमाडौं । नेपाली कांग्रेसको १५ औं महाधिवेशनअन्तर्गत आज नयाँ केन्द्रीय कार्यसमितिका लागि मतदान हुँदैछ । सभापति, उपसभापति, महामन्त्री, सहमहामन्त्री तथा केन्द्रीय सदस्य पदहरूमा सयौं संख्यामा उम्मेदवारहरू भिड्दैछन्।

कांग्रेसले यसपटक निर्वाचन आचारसंहितामा उम्मेदवारहरूलाई भड्किलो प्रचारसामग्री प्रयोगमा रोक लगाएको थियो । महाधिवेशनअघि निर्वाचन समितिले जारी गरेको आचारसंहितामा तडकभडक र भड्किलो प्रचारप्रसारमा पूर्णतया रोक लगाइने भनेको थियो।

विपद्पछिको परिस्थितिलाई सम्मान गर्दै महाधिवेशनलाई मर्यादित, मितव्ययी र अनुशासित बनाउन जुनसुकै प्रकारका भड्किला प्रचार अभियानहरूलाई पूर्ण रूपमा निषेध गरिएको निर्वाचन समितिमा सदस्य सचिव राजु कटुवालले बताएका थिए ।

त्यस्तै सभापति गगन थापाले पनि यी क्षेत्रमा प्रचार सामग्रीहरू नराख्न निर्देशन नै दिएका थिए। बुधबारको बन्दसत्रमा उनले भनेका थिए, ‘हाम्रो महाधिवेशनस्थल वरपर प्रचार सामग्रीहरू राख्ने, पर्चापम्प्लेट टाँस्ने काम कसैले पनि नगरौं । केही साथीहरूको देखिएको छ। त्यसलाई हटाउँ। तपाईंहरूले नहटाए भोलेन्टियर साथीहरूले हटाउनुहुनेछ।’

तर, बिहीबार महाधिवेशन स्थल खुलामञ्ज, राष्ट्रिय सभागृह र भृकुटीमण्डप क्षेत्र पूरै प्रचार सामग्रीले फोहोर देखिएको छ । जताततै भित्ताभरि र सडकभरि उम्मेदवारका पर्चा, पम्प्लेट, ब्यानर टाँसिएका छन् । भुइँमा असरल्ल छरिएका प्रचार सामग्री प्रतिनिधिहरूले कुल्चिंदै हिंडिरहेका छन्।

यो पनि पढ्नुहोस