नानाको सम्झनामा शाहरुख, ‘अब अर्को कप चिया पिउन र क्यारम खेल्न समय भएन’

जब युवा शाहरुख खान पहिलोपटक दिग्गज अभिनेता नाना पाटेकरसँग भेट्न पुगेका थिए, उनी मनभित्रको कौतूहल र अप्ठ्यारोपन लुकाउन आफ्ना कपाल मिलाउँदै थिए ।

तर, अगाडि उभिएका पाटेकरले कुनै औपचारिकता देखाएनन् । उनले तत्कालै शाहरुखको हात पन्छाउँदै चर्को स्वरमा भनेका थिए, ‘हिरोले जस्तो कपाल नबनाऊ… तिमी एक अभिनेता हौ !’

बलिउडका बादशाह मानिने शाहरुख खानले आज जीवनकै त्यही पहिलो भेट सम्झँदै नाना पाटेकरप्रति अत्यन्तै मार्मिक र भावनात्मक श्रद्धाञ्जली अर्पण गरेका छन् ।

सामाजिक सञ्जालमा आफ्ना मनका भावना पोख्दै शाहरुखले नानालाई केवल एक सहकर्मीका रूपमा मात्र होइन, आफ्ना गुरु, आलोचक र अनपेक्षित आत्मीयता भएका एक सच्चा मित्रका रूपमा स्मरण गरेका हुन् ।

खरो स्वभावभित्र न्यानो अङ्गालो

नाना पाटेकरको स्वभाव अरूभन्दा भिन्न थियो, सीधा, खरो, तर उत्तिकै निष्कपट। शाहरुखका अनुसार नानाले कहिल्यै कसैलाई खुसी पार्न झुटो प्रशंसा गरेनन् ।

उनी मानिसहरूलाई जे सुन्न मन लाग्थ्यो, त्यो होइन, जे सुन्न आवश्यक थियो, त्यहीं भन्थे ।

उनको माया देखाउने तरिका पनि निकै अनौठो थियो,’ शाहरुख लेख्छन्, ‘उनी सुरुमा तपाईंमाथि जोडले चिच्याउँथे, गाली गर्थे ।

तर तेस्रो वा चौथो गालीपछि बल्ल थाहा हुन्थ्यो, ‘तपाईं त उनको न्यानो अङ्गालोमा बेरिनुभएको छ।’

बाहिरबाट रुखो देखिने स्वभावभित्र लुकेको त्यही अपार माया र उनको त्यो सुन्दर मुस्कानले जोकोहीलाई पनि नजिक बनाउँथ्यो ।

क्यारम बोर्डका च्याम्पियन र चियाको कप

पर्दामा सशक्त र गम्भीर अभिनय गर्ने नाना वास्तविक जीवनमा भने रमाइलो र प्रतिस्पर्धात्मक स्वभावका थिए । शाहरुखका लागि नाना क्यारम बोर्डका अपराजित खेलाडी थिए ।

‘उनी मलाई र वरपरका सबैलाई क्यारमको हरेक खेलमा हराउँथे र आफ्नो जितको खुलेर उत्सव मनाउँथे,’ शाहरुखले विगतका दिनहरू सम्झिएका छन् ।

शाहरुखले भनेका छन्,  मनमा अझै पनि नानासँग थप भलाकुसारी गर्ने, नयाँ तर्क–वितर्कमा अल्झिने, चियाको अर्को चुस्की लिने र क्यारमको अर्को बाजी खेल्ने रहर बाँकी नै थियो। तर, समयले त्यो अवसर खोसिदिएको छ।’

जीवनपर्यन्त गुञ्जिरहने त्यो एक वाक्य

भारतीय र विश्व सिनेमा जगत्मा नाना पाटेकरको स्थान सधैँ अद्वितीय रह्यो । उनको अभिनयको गहिराइ, खरोपन, हँसीमजाक र ऊर्जा सधैँ स्मरणीय रहनेछ ।

तर, शाहरुखका लागि भने नानाले वर्षौंअघि दिएको त्यो एउटा गुरुमन्त्र जीवनभर मुटुमा रहनेछ, ‘हिरो बन्ने चक्करमा आफूभित्रको अभिनेतालाई कहिल्यै नगुमाउनू ।’

सिनेमा क्षेत्र र लाखौँ दर्शकको मनमा कहिल्यै नपुरिने रिक्तता छाडेर बिदा भएका आफ्ना ‘हिरो-एक्टर’ प्रति भावुक हुँदै शाहरुखले लेखेका छन्, ‘स्वर्ग पनि आज एक महान् अभिनेता र अपराजित क्यारम च्याम्पियन पाएर धन्य भएको होला। म तपाईंलाई धेरै सम्झिनेछु, नाना !’