हतियार खोस्न खोजेपछि सप्तरीमा गोली चलाउनु पर्‍यो : गृहमन्त्री

२ भदौ, काठमाडौं । उपप्रधान एवं गृहमन्त्री बामदेव गौतमले सप्तरीको भारदहमा आन्दोलनकारीले प्रहरी चौकीमा आक्रण गर्नुका साथै सुरक्षाकर्मीको सञ्चार सेट र हतियार खोस्ने प्रयास गरेपछि गोली चलाउने परेको दाबी गरेका छन् ।

भारदह घटनाबारे व्यवस्थापिका संसदलाई जानकारी गराउँदै गृहमन्त्री गौतमले शान्ति सुरक्षामा खलल नपुर्‍याउन प्रहरीले बारम्बार आग्रह गरेको तर, आन्दोलनकारीले सशस्त्र प्रहरीको गाडिमा आक्रमण गर्नुका साथै प्रहरी चौकीमा ढुंगामुढा गरेको बताएका छन् ।

सुरक्षाकर्मीको गाडिमा तोडफोड भएपछि प्रहरीले लाठी र अश्रुग्यास हानेर नियन्त्रणको प्रयास गरेको तर, प्रहरीको हतियरा नै खोस्ने प्रयास भएपछि बाध्य भएर गोली चलाउँदा राजीव राउतको मृत्यु भएको गृहमन्त्रीले दाबी गरे ।

तर, सभासदहरुले भने गृहमन्त्रीको जवाफप्रति असन्तुष्टि जनाएका छन् ।

एमाओवादी सभासद उमेशकुमार यादवले सप्तरीको भारदहमा प्रहरीले नै शान्तिपूर्ण प्रदर्शनलाई उत्तेजित बनाएर दमन गरेको बताए ।

एमाले सभासद सत्यनारायण मण्डलले सप्तरीको भारदहमा स्थानीयवासीले गरेको शान्तिपूर्ण प्रदर्शनमाथि घुसपैठ गरिएको र प्रहरीमाथि गोली चलाइएको भनेर सरकारले दमन गरेको भन्दै घटनाको छानबिनका लागि उच्चस्तरीय समिति गठन गर्न माग गरे ।

अर्का सभासद सुरेन्द्रप्रसाद जैसवालले संविधान निर्माणका क्रममा आफ्नो हक अधिकारका विषयलाई लिएर मुलुकका विभिन्न स्थानमा भइरहेको शान्तिपूर्ण प्रदर्शनमाथि दमन गरेर नागरिकको शान्तिपूर्ण प्रदर्शन गर्न पाउने अधिकार हनन भएको धारणा राखे ।