सय युवती हेर्दा पनि जीवनका लागि भेटिइनन् ‘उजेली’

नायक जीवन लुइटेलका लागि खोजी गरिएकी ‘उजेली’ फेला नपर्दा अहिले निर्देशक ऋषि लामिछानेलाई हैरानी भएको छ । अनलाइनखबरको कार्यलयमा आएका ऋषिले भने-‘सय यूवती हेरिसक्यौं, तर ‘उजेली’ भेटिएकी छैनन् ।’

वास्तवमा यी ‘उजेली’को हुन्, यीनको चर्चा गरौ । ‘उजेली’ एक पात्र हुन्, जसले यही नाममा बन्न लागेको नयाँ चलचित्रको शिर्ष भूमिकामा काम गर्नेछिन् । ऋषि लामिछानेको निर्देशनमा ओम ध्वज राइले निर्माण गर्न लागेको नयाँ चलचित्र ‘उजेली’का लागि नायिकाको खोजी गरिएको हो ।

यसका निर्माता र निर्देशक नयाँ यूवती नै लिने सोचमा छन् । चलचित्रको कथा पूर्ण रुपमा गाउँले परिवेशमा तयार हुनेछ । ऋषिले ‘उजेली’ बन्ने यूवतीका बारेमा भने-‘उनीमा सत प्रतिशत अभिनय छ भने सुन्दरता पनि त्यस्तै हुनुपर्छ । नेपाली नारीको प्रतिनिधित्व गर्ने, नेपाली सपना देख्ने र नेपालमै बाँच्ने यूवतीको भूमिकामा हामीले ‘उजेली’लाई प्रस्तुत गर्नेछौ ।’

चलचित्रका लागि अर्जुन पोख्रेलले संगीत भरिसकेका छन् भने जगदिश्वर थापाले कथा पनि तयार पारिसकेका छन् । मुख्य भूमिकामा काम गर्ने यूवती पाएको खण्डमा १५ दिन भित्र सुटिङ सुरु गर्ने योजना निर्देशकको छ ।

निर्माता ओमध्वजले यस भन्दा अगाडि भिडियो चलचित्र बनाइसकेका छन् । उनी लामो समयदेखि सिंगापुरमा बस्दै आएका छन् । नायक जीवन लुइटेल अमेरिकाबाट आए लगतै उनलाई चलचित्रमा अनुवन्धित गरिएको हो ।

नेपाली चलचित्र क्षेत्रमा सफल चलचित्र निर्माण गर्दै आएका ऋषिका लागि ‘उजेली’ बन्ने यूवती को होलिन्, प्रतिक्षा गरौ ।