मिडियासँग सजग हुँदै ३ खान, साहरुखले भने-‘मेरो इद खराब नगर्नुहोस्’

बलिउडका चर्चित ३ खान अहिले विवादस्पद बयान दिनबाट टाढा भाग्न थालेका छन् । सकारात्मक कुरालाई पनि मिडियाले नकारात्मक तरिकाले प्रस्तुत गरेर ठूलो विवादमा पारिदिएपछि खानहरु सजग देखिएका हुन् । बिहिबार इद पर्वको अवसरमा बलिउड नायक साहरुख खान मिडियालाई आफ्नो निवासमा बोलाए ।

उनले धेरै प्रश्नको उत्तर रमाइलो तरिकाले दिए । तर, मिडियाले सोधेको एक प्रश्नको उत्तर दिन मानेनन् । साहरुखलाई जब एक पत्रकारले ‘ढाकामा भएको चमरपन्थी हमला’को बारेमा सोधे, साहरुख केही सजग देखिए । उनले भने-‘गतबर्ष मेरो जन्मदिनमा पत्रकार र टीभीले मेरो सानो कुरालाई हंगामा बनाएका थिए ।

मैले जे बोलेको थिएँ, राम्रो कुरा भनेको थिएँ । यसैले अब यस्तो प्रश्न नगर्नुहोस् जसले मेरो इद नै खराब गरोस् ।’ साहरुखले आमिर र सलमानले कुस्तीको कथामा चलचित्र गरेपनि आफूले नगर्ने बताए । उनले आफूले अझै पर्दामा रोमान्स नै गर्ने बताए ।

साहरुखले सलमान र आमिरसँगै बसेर इद मनाउन मनपर्ने बताए । कान्छा छोरा अव्राहमसँगै फ्यानलाई अभिवादन गरेका साहरुखले मिडियासँग आफ्नो नयाँ चलचित्रको बिषयमा कुरा गरे । उनले इम्तियाज अलीको नयाँ चलचित्रमा अनुष्का शर्मासँग काम गर्न लागेको बताए । यस्तै, उनले चलचित्र ‘डीयर जिन्दगी’ नोभेम्बरमा आउने पनि बताए ।