मलेसियाका मन्त्रीले गरे पशुपतिमा पूजा

१२ कात्तिक, काठमाडौं । मलेसियाका मानव संशाधन मन्त्री एम. कुलासेगरनले पशुपतिमा पूजाआजा गरेका गरेका छन् । हिजो राति ११ बजे काठमाडौं आइपुगेका मन्त्री कुलासेगरनले सोमबार बिहान ८ बजे पशुपति मन्दिर पुगेर पूजा गरेका हुन् ।

मन्त्री कुलासेगरनलाई पशुपति विकास क्षेत्र कोषका कार्यकारी निर्देशक रमेश उप्रेती र सदस्यसचिव प्रदीप ढकालले अवलोकन गराएका थिए । सो अवसरमा कोषले धार्मिक पर्यटन प्रवर्द्धनमा सहयोग गर्न मलेसियाका मन्त्रीसँग आग्रह गरेको थियो ।

सो क्रममा आफूले १० वर्षअघि नौ दिन नेपाल भ्रमण गरेको स्मरण गर्दै मन्त्री कुलासेगरनले मलेसियाका हिन्दू धर्मावलम्बीलाई नेपाल भ्रमणका लागि आह्वान गर्ने बताएको कार्यकारी निर्देशक उप्रेतीले जानकारी दिए ।

मन्त्री कुलासेगरनले पूजापछि बागमती नदी किनारमा शवदाह गरिएकाे दृश्य केहीबेर अवलाेकन गरेका थिए ।

पशुपति नाथको मूल मन्दिर, १५ शिवालय, गोरखनाथलगायत विभिन्न मठमन्दिरको पनि उनले अवलोकन गरेका थिए । उनले चिया पसलमा बसेर चिया पनि पिए ।

नेपालसँग श्रम सम्झौताका लागि नेपाल आएका कुलासेगरनले आजै दिउँसो पाटन दरबार र नारायणहिटी संग्रहालयको अवलोकन गर्ने कार्यक्रम छ ।

श्रम तथा रोजगार मन्त्रालयका अनुसार, मलेसियासँगको श्रम सम्झौतामा ११ बजे दुर्इ देशबीच हस्ताक्षर हुनेछ ।