मन (कविता )

चुलबुले, चञ्चले, अस्थिर छ मन

हिजो अन्तै थियो

आज कवितामा छ मन

नाप्न नसकिने, जोख्न नमिल्ने

कतै नरोकिने, कवै नथाक्ने

बिजुलीभन्दा द्रुत गतिको

बेग कसैले थाम्न नसक्ने

भण्डारण क्षमता असीमित भएको

एउटा बृहद् सन्दुक हो मन ।

दशौँ इन्द्रियहरूमा नपर्ने

एघारौँमा परेर के भो ?

सबै इन्द्रियहरूको सारथी हो मन

प्राणी जगतको राजा हो मन ।

सुषुप्तिमा या जाग्रतमा

अथक, अविराम चलिरहने

कहिले उर्लने भेल बनेर

कहिले शान्त समुन्द्र भएर

रूवाउने हसाउने मनको बानी

कल्पनाशिलताको हो यो खानी।

लीला छ यसको अपरम्पार

कृष्ण बनेर मन दायावान हुन्छ

द्रौपदीको लाज ढाक्न पुग्छ

कृष्णको उही मन पवित्र हुँदैन

वस्त्र लुकाई गोपिनीहरूको

गोप्य अङ्गको प्यासी बन्छ

असल मात्र हैन उद्धण्ड पनि छ

कहिले यो मन राम बन्छ

कहिले रावण भै सीता हर्छ ।

अति अनियन्त्रित अति विचलित

पथभ्रष्ट र गतिछाडा मन

बाटो बिराउँछ-पागल बन्छ

महौषधिको सेवन गराई

बसमा राख्न सक्नुपर्छ

रोकौँ बरालिनबाट मनलाई

सङ्किर्ण होइन बिराट बनाऔँ

सन्तुष्टिको श्रीपेच पहिरी

सम्यमताको चन्दन लगाऔँ ।

मनविहीन तन कस्तो होला ?

सास बेगरको लास बन्ला

मनका कतिपय गोप्यताहरू

उजागर हुँदैनन् जीवन पर्यन्त

चिता वा चिहानमा पुगेर

भष्म हुन्छन् लाससँग ।

गोरखा बजार                                                           

हालः म्याडिसन,अमेरिका