१९ चैत, काठमाडौं । इटलीमा कोरोना भाइरस (कोभिड–१९)बाट मृत्यु हुनेको संख्या पछिल्लो २४ घण्टामा घटेको छ । यससँगै बिस्तारै कोरोना मृत्यु हुनेको संख्यामा कमी आउनसक्ने आशा बढेको छ ।
इटालीको स्वास्थ्य मन्त्रालयकाअनुसार मंगलबार सात सय २७ जनाको कोरोना भाइरसका कारण मृत्यु भएको जनाएको छ । यसअघि सोमबार आठ सय १२ जनाको भाइरसको कारण मृत्यु भएको थियो ।
यससँगै इटालीमा समग्र मृत्यु हुने मानिसको संख्या पनि १३ हजार एक सय ५५ पुगेको छ ।
यस्तै, दुई हजार नौ सय ३७ नयाँ संक्रमित फेला परेका छन् । यससँगै इटालीमा समग्र संक्रमितको संख्या पनि एक लाख १० हजार नाघेको बीबीसीले जनाएको छ ।
यसैबीच, इटालीले शुक्रबारदेखि सकिन लागेको लकडाउनको अवधि १० दिनले लब्याउने निर्णय पनि गरेको छ । यससँगै इटालीमा अप्रिल १३ सम्म लकडाउन जारी रहनेछ ।
पछिल्लो तीन सातादेखि इटालीमा लकडाउन जारी छ ।
