१० जेठ, काठमाडौं । झण्डै एक सातादेखि बन्द रहेको पशुपति आर्यघाटको विद्युतीय शवदाह गृह आइतबारदेखि सञ्चालनमा आउने भएको छ ।
कोरोना भाइरस संक्रमणको जोखिमसँगै गत जेठ ४ गतेदेखि बन्द रहेको शवदाह गृह आइतबारदेखि सञ्चालनमा ल्याउने तयारी गरिएको पशुपति क्षेत्र विकास कोषले जनाएको छ ।
नेपालमा पहिलोपटक काभ्रेको धुलिखेल अस्पतालमा मृत्यु भएकी कोरोना संक्रमितको गत शनिबार पशुपति क्षेत्रमा रहेको सो शवदाह गृहमा अन्त्येष्टि गरिएको थियो । त्यससँगै स्यानिटाइज गर्नको लागि भनेर शवदाहगृह बन्द गरिएको थियो ।
पशुपति क्षेत्र विकास कोषका कार्यकारी निर्देशक डा. घनश्याम खतिवडाले आइतबारदेखि विद्युतीय शवदाहगृह सञ्चालनमा आउने जानकारी दिए ।
शवदाह गृहसँगै बन्द भएको पशुपतिको किरियापुत्री भवनका पाँचवटा कोठा सञ्चालनबारे भने निर्णय भइनसकेको खतिवडाले बताए ।
दिल्लीबाट आएका केही किरियापुत्रीहरू कोभिडको परीक्षण नगरी किरियापुत्री भवनमा आएर बसेकोले शंकास्पद पाँचवटा कोठा स्यानिटाइज गर्नको लागि बन्द गरिएको उनले बताए ।
खतिवडाले भने ‘अरू कारणले नभई तिनै शंकास्पद व्यक्ति बसेका कारणले हामीले ती कोठा बन्द गरेका हौं । अब स्यानिटाइज गरेपछि ती कोठासमेत सञ्चालनमा ल्याउँछौं ।
अहिले किरियापुत्री भवनमा कुल ३४ कोठाहरू रहेका छन् । जसमध्ये २९ वटा कोठामा अहिले किरियापुत्री रहेको र एउटा कोठा शनिबारदेखि खाली हुन लागेको कोषले जनाएको छ ।