चलचित्र ‘जानी नजानी’बाट नेपाली चलचित्र क्षेत्रमा प्रवेश गरेकी नायिका निरिशा बस्नेत मुम्बईमा छिन् । मुम्बईमा रहेकी यी नायिकामा कोरोना संक्रमण देखिएको छ ।
उनको रिपोर्ट पोजिटिभ आएपछि उनी अस्पतालमा उपचार गराइरहेकी छिन् । उनी मुम्बईको कोकिला अस्पतालमा उपचार गराइरहेको बुझिएको छ ।
अब रिपोर्ट नेगिटिभ नआएसम्म उनी अस्पतालमै रहेर उपचार गराउने छिन् । कलाकार विश्व बस्नेतकी छोरी निरिशाले भारतमा रहेर विभिन्न सिरियलमा काम गरिरहेकी छिन् ।
उनले बलिउड चलचित्रमा प्रवेशका लागि संघर्ष गरिरहेकी थिइन् । चलचित्र ‘जानी नजानी’को रिलिजको समयमा उनी नेपाल आएकी थिइन् । यो चलचित्रले बक्स अफिसमा खासै सुखद् व्यापार गर्न नसकेपछि उनी मुम्बईमा नै संघर्ष गरिरहेकी थिइन् ।
