४ असार, काठमाडौं । काठमाडौं महानगरपालिकाले टेकु र लैनचौरमा भर्टिकल पार्किङ भवन निर्माण गर्ने भएको छ ।
आगामी आर्थिक वर्ष २०७७/७८ मै यस्तो भवन निर्माण सुरु गरिने महानगरपालिकाको नीति तथा कार्यक्रममा उल्लेख छ । टेकुस्थित महानगरपालिकाकै जग्गा र लैनचौरको सार्वजनिक जग्गामा यस्तो भवन बनाउने योजना महानगरपालिकाले सार्वजनिक गरेको छ ।
काठमाडौं उपत्यकाको ट्राफिक जामको समस्या न्यूनीकरण तथा पार्किङको अभाव हटाउन यो कार्यक्रम प्रभावकारी हुने महानगरको विश्वास रहेको छ ।
महानगरपालिकाले प्रारम्भ गरेको स्मार्ट पार्किङलाई थप क्षेत्रमा विस्तारको योजना समेत नीति तथा कार्यक्रममा समेटिएको छ ।