तीन पूर्व विश्व च्याम्पियनको समूह डीमा परेर पनि कोष्टारिकाले विश्वकप फुटबलमा क्वाटरफाइनलसम्म यात्रा तय गर्यो । ४.५ मिलियन जनसंख्या रहेको कोष्टारिकाको टोली ब्राजिल विश्वकपमा डार्कहर्सका रुपमा छाएको थियो ।
क्वाटरफाइनलमा नेदरल्याण्डसँग टाइब्रेकरमा पराजित हुँदै कोष्टारिकाको टोली घर फर्किएको छ । विश्वकपमा शानदार प्रदर्शन गरेका खेलाडीहरुलाई राजधानीमा भब्य स्वागत भएको छ । खेलाडीहरुको स्वागतका लागि हजारौं समर्थकसँगै राष्ट्रपति लुइस गिलमो सोलिस समेत विमानस्थलमा आइपुगेका थिए ।
विमान अवतरण गर्नासाथ गोलकिपर नाभासले अगाडी झ्यालबाट देशको झण्डा फहराए । लगतै खेलाडीहरुको स्वागतमा पानीको फोहोरा छोडिएको थियो ।
विमानबाट झरेका खेलाडीहरुलाई राष्ट्रपति सोलिसले हात मिलाएर स्वागत गरेका छन् । विमानस्थालमा देशको झण्डासहित आएका समर्थकहरुको ठूलो भिड थियो । खेलाडीहरुलाई गरिएको स्वागत च्याम्पियनलाई भन्दा कम थिएन । खेलाडीहरुले समर्थकसँगै नाचगान समेत गरेका छन् ।
