१६ साउन, काठमाडौं । भारतीय प्रधानमन्त्री नरेन्द्र मोदीलाई व्यवस्थापिका संसदको ड्यासमा नै राखिने भएको छ । यसका लागि रोष्टम नजिकै नयाँ पोडियम (सिट) बनाइने भएको छ ।
कार्यव्यवस्था परामर्श समितिको शुक्रबार बसेको बैठकले संसदमा सम्बोधनका लागि आउँदा मोदीलाई राख्ने स्थान टुङ्गो लगाएको हो । ‘छुट्टै पोडियम बनाएर ड्यासमै राख्ने निर्णय भएको छ’ सभासद प्रेमबहादुर सिंहले अनलाइनखबरसँग भने ।
यसअघि मोदीलाई ड्याममा राख्दा प्रधानमन्त्री भने तल सभासदहरुसँगै अगाडिको लहरमा हुने भएकाले प्रोटोकल नमिल्ने हो कि भन्ने चर्चा चलेको थियो ।
दुई दिने नेपाल भ्रमणका क्रममा आइतबार बिहान काठमाडौं आउने मोदीले अपराहृन ४० मीनेट संसदलाई सम्बोधन गर्नेछन् । नेपालको संसदमा विदेशी सरकार तथा राष्ट्रप्रमुखले रोष्टममै उभिएर सम्बोधन गर्न लागेको यो पहिलो घटना हो ।
भारतीय प्रधानमन्त्री मोदीलाई संसदको गेटमा पुग्दा सभामुख नेम्वाङले स्वागत गर्नेछन् । मोदीलाई रातो कार्पेटबाट सभामुखको चेम्बरमा लगिनेछ, जहाँ भेटका लागि कार्यकक्षलाई चिटिक्क बनाउने काम भइरहेको छ ।
भारतीय प्रधानमन्त्री मोदी र सभामुख नेम्वाङबीच २५ मिनेट वार्ता हुनेछ । यो वार्ताका क्रममा नेम्वाङले मोदीलाई विशेष इलामे चियाले स्वागत गर्नेछन् ।
सभामुखसँगको भेटपछि मोदीले संसदमा गएर सम्बोधन गर्नेछन् । मोदीलाई बाहिरिनुअघि सभामुखले धन्यवाद प्रस्ताव पारित गर्दै संसदको बैठक आधा घण्टाका लागि स्थगित गर्नेछन् ।
