१४ फागुन, काठमाडौं । विश्वकप क्रिकेटमा श्रीलंकाले बंगलादेशमाथि ९२ रनको फराकिलो जित हात पारेको छ ।
विश्वकपको पहिलो खेलमा न्यूजिल्याण्डसँग पराजित श्रीलंकाको त्यसपछि भने लगातार दोस्रो जित हो । यसअघि उसले अफगानिस्तानलाई ४ विकेटले पराजित गरेको थियो ।
मेलबर्नमा पहिले ब्याटिङ गरेको श्रीलंकाले तिलकरत्ने दिलशान र कुमास सांगाकाराको शतकको मदतमा ५० ओभरमा १ विकेट गुमाएर ३३२ रन बनायो । पहिलो विकेटका लागि ओपनर लाहिरु थिरिमाने र दिलशानले १२२ रनको साझेदारी गरे ।
थिरिमाने ५२ रनमा आउट भएपछि दिलशान र सांगाकारले श्रीलंकन पारी सम्हाले । उनीहरुले अविजित २१० रनको साझेदारी गरे । दिलशान १६१ र सांगाकारा १०५ रनमा अविजित रहे ।
जवाफमा मैदान उत्रिएको बंगलादेश ४७ ओभरमा २४० रन जोड्दा अलआउट भयो ।
इनिङको दोस्रो बलमा नै पहिलो विकेट गुमाएको बंगलादेशले १०० रन जोड्दा ५ विकेट गुमाइसकेको थियो । छैटौं विकेटका लागि सकिब हल हसन र मुस्फिकर रहिमले ६४ रनको साझेदारी गरे । छैटौं विकेटका रुपमा सकिव ४६ रनमा आउट भए ।
रहिमले सातौं विकेटका लागि सविर रहमान ४४ रनको सझेदारी गर्दै बंगलादेशलाई आश देखाए । तर, उनीहरुको साझेदारी टुटेपछि बंगलादेश हारतर्फ उन्मुख भयो ।
सविरले ५३ रन बनाए भने रहिम ३६ रनमा आउट भए ।
बंगलादेशलाई सस्तैमा समेट्ने क्रममा लासिथ मालिंगाले ३ विकेट लिए भने सुराङ्गा लकमल र तिलकरत्ने दिलशानले समान २-२ विकेट हात पारे ।
दिलशान म्यान अफ दि म्याच बने ।
