लन्डन । गैरआवासीय नेपाली संघ (एनआरएन) यूके र नेपाल पत्रकार महासंघ यूके शाखाको आयोजनामा आगामी मे ३१ तारिख आइतवार लन्डनमा च्यारिटी कार्यक्रम हुने भएको छ ।
पत्रकार महासंघ यूके शाखाका अध्यक्ष चिरन शर्माले पत्रकारको क्षमता अभिवृद्धि तथा पत्रकार कल्याणकारी कोष स्थापनार्थ च्यारिटी शो आयोजना गर्न लागिएको जनाएका छन ।
लण्डनको भेन्यू फाईभ पार्टी हलमा आयोजना गर्न लागिएको उक्त कार्यक्रमको संयोजन एनआरएन यूके कार्यसमिती सदस्य तथा पत्रकार फणिन्द्र भट्टराईले गर्ने भएका छन ।
एनआरएन यूके अध्यक्ष महेन्द्र कंडेलका अनुसार एनआरएन यूकेको यसअघि बसेको बैठकको निर्णयअनुसार कार्यक्रम तय गरिएको हो । कँडेलले गैरआवासीय नेपाली संघले विभिन्न संघ-संस्थासँग सहकार्य गरेको स्मरण गर्दै सो च्यारिटी कार्यक्रमले नेपाली पत्रकारिता जगतलाई टेवा पुग्ने अपेक्षा गरेका छन् ।
एनआरएन यूकेको बैठकले कार्यसमिति सदस्य फणिन्द्र भट्टराईको संयोजकत्वमा सल्लाहकार बाचस्पति रेग्मीसमेत रहेको तयारी समिति गठन गरेको थियो ।
नेपाल पत्रकार महासंघ यूके शाखाको सहकार्यमा सो समितिलाई बिस्तार गरिएको संयोजक भट्टराईले जानकारी दिए । बिस्तारित समितिमा एनआरएनबाट उपाध्यक्ष कृष्ण तिमल्सिना र सचिव दाशु पाण्डे तथा पत्रकार महासंघबाट नरेश खपांगी मगर, धर्मराज अधिकारी तथा देवी गौतम रहेका छन ।
समितिको सल्लाहकारमा गैरआवासीय नेपाली संघ यूकेका पूर्वअध्यक्षहरु महन्त श्रेष्ठ, डमर घले, सूर्य गुरुङ, कुल आचार्य, योगेन क्षेत्री, पूर्व महासचिव रामशरण सिम्खडा, पत्रकार महासंघ यूकेका संस्थापक अध्यक्ष नवीन पोखरेल र वरिष्ठ पत्रकार भगीरथ योगी छन ।
पत्रकार महासंघ यूके शाखाका अध्यक्ष शर्माले गैरआवासीय नेपाली संघ यूकेको सहकार्यमा हुन लागेको सो च्यारिटी कार्यक्रमलाई सहयोग गर्न बेलायतबासी नेपालीलाई आग्रह गरेका छन ।
गैरआवासीय नेपाली संघ यूके र शाखाको सक्रियतामा गरिएको च्यारिटी कार्यक्रमबाट करिब १६ लाख रुपैयाँ जम्मा भएको थियो । सो रकमबाट एनआरएन अन्तर्राष्ट्रिय पत्रकारिता पुरस्कारका लागि अक्षयकोष स्थापना गरिएको छ ।
