२२ मंसिर, काठमाडौं । सर्वसाधारणको रकम ठगी गर्ने एक सहकारी सञ्चालकलाई प्रहरीको केन्द्रीय अनुसन्धान व्युरोले पक्राउ गरेको छ । मकवानपुरको दामन गाविस ७ स्थायी घर भइ हाल काठमाडौंको अनामनगर बस्दै आएका ३० वर्षीय मिनबहादुर बस्नेतलाई प्रहरीले पक्रेको हो ।
बस्नेत २०६२ सालदेखि मकवानपुरको दामन गाविस ५ स्थित पालुङ बचत तथा ऋण सहकारी संस्थाको संचालक समितिका उपाध्यक्ष हुन् । बस्नेतलगायतका सहकारी सञ्चालकले एक हजार एक जना बचतकर्ताबाट .३ करोड ६२ लाख ३२ हजार ६६ रुपैयाँ ठगी गरेका थिए ।
उनलाई काठमाडौं जिल्ला अदालतको आदेशअनुसार कैद भुक्तानको लागि डिल्लीबजार कारागारमा चलान गरिएको प्रहरीले जनाएको छ ।
सोही मुद्दाका प्रतिवादीहरुमध्ये तुलसीकुमारी बस्नेत अनामनगरबाट र हरि बस्नेत नयाँ नैकापबाट गत असार महिनामै पक्राउ परिसकेका छन् ।
