९ वैशाख, बुटवल । एकीकृत नेकपा माओवादीका प्रवक्ता दीनानाथ शर्माले नेपाली कांग्रेस र मधेसवादी दलहरुलाई पनि सरकारमा सहभागी हुन आह्वान गरेका छन् । उनले कांग्रेस र मधेसवादी दल सरकारमा आए नेतृत्वको विषयमा छलफल गर्न सकिनेसमेत बताए ।
क्रान्तिकारी पत्रकार संघ नेपाल रुपन्देहीले आज बुटवलमा आयोजना गरेको पत्रकार सम्मेलनमा नेता शर्माले सरकार फेर्ने विषयमा भने एमाओवादीले कुनै धारणा नबनाएको स्पष्ट पारे ।
उनले गत वर्ष देशमा गएको भूकम्पका पीडितलाई अझै पनि सरकारले उचित व्यवस्थापन गर्न नसकेको भन्दै यसतर्फ चासो दिनसमेत आग्रह गरे । उनले बजारलाई नियन्त्रण गर्न नसक्दा महँगीले सीमा नाघेको र बजार सरकारको नियन्त्रण बाहिर रहेको धारणा राखे ।
उनले सरकारले नयाँ नीति बनाएर बजार हस्तक्षेप गर्न नसके निजी क्षेत्रको मनोमानी बढ्ने भन्दै नेता शर्माले बजारको संरचनालाई व्यवस्थित गर्नुपर्नेमा जोड दिए ।
नेता शर्माले सरकारले अहिले पनि विसं २०२८ को शिक्षा ऐनले शिक्षा क्षेत्र चलाएको भन्दै शिक्षामा परिवर्तन हुन आवश्यक रहेको उल्लेख गरे । रासस