२१ वैशाख, काठमाडौं । भूकम्पपछिको पुनर्निर्माण गर्न बिभिन्न मुलुक तथा दातृ निकायद्वारा घोषित सहायताको एक चौथाइ मात्रै रकम ल्याउन सम्झौता भएको छ । भूकम्पपीडित नेपाललाई सहयोग गर्न नपाएकोमा दाताहरुले आफ्नो संसद तथा अन्य फोरममा आवाज उठाउँदा पनि नेपाल सरकारले पैसा ल्याउने सार्थक पहल गर्न सकेको छैन नयाँ पत्रिका दैनिकमा समाचार छ ।
पुनर्निर्माणका लागि सहयोग जुटाउन गत वर्ष १० असारमा आयोजित पुनर्निर्माण सम्मेलनमा दाता राष्ट्र तथा निकायले चार अर्ब १० करोड अमेरिकी डलर अर्थात् चार खर्ब १० अर्ब रुफैयाँभन्दा बढी रकम दिने घोषणा गरेका थिए । तर, एक वर्ष बित्न लाग्दा पनि सरकारले जम्मा एक चौथाइ अर्थात् एक खर्ब २९ अबए रुपैयाँ मात्रै नेपाल ल्याउने प्रवन्ध मिलाएको छ ।
दाता सम्मेलनमा सबैभन्दा धेरै एक अर्ब ४० करोड डलर सहयोग घोषणा गरेको भारतसँग २५ करोड डलरको मात्रै सम्झौता भएको छ । ७६ करोड ६९ लाख डलर सहयोग घोषणा गरेको चीनसँग पाँच करोड ८० लाख डलरको सम्झौता भएको छ ।
