पाँच वर्षअघिदेखि कुखुरापालन, सुँगुरपालन र तरकारी खेती सुरु गरेका थापा पछिल्लो समय बाख्रापालनतिर आकर्षित भएका हुन्। एक्लो प्रयासमा थापाले सुरु गरेको व्यावसायिक पशुपालन र कृषि गाउँमै नमुना बनेको छ । थापाले भने, “विदेशमा जति कमाउने पैसा मैले घरमै बसेर कमाउन सफल भएको छु ।”

थापाको अहिले सम्पूर्ण खर्च कटाएर मासिक आम्दानी ४० हजारभन्दा बढी छ । उनको कुखुरा फार्ममा अहिले ब्रोइलर, कोइलर र स्थानीय गेरर करिब एक हजार २०० जति कुखुरा रहेका छन् । त्यस्तै स्थानीय जातका सुँगुर छ वटा छन् । थापाले सुँगुर र कुखुरा पालनको लागि स्थानीय विद्यालयको जग्गामा भाडामा लिएका छन्। तरकारी खेतीको लागि पनि व्यक्तिको जग्गा ५० हजारमा भाडामा लिएको थापाले जानकारी दिए।

करिब पाँच रोपनी क्षेत्रफलमा आलुखेती पनि गरेको थापाले जानकारी दिए ।  वार्षिक ५० देखि ७० मुरीसम्म आलु फल्ने गरेको उनको भनाइ छ । व्यावसायिक कृषि पेसा सञ्चालनको लागि थापाले साना किसान सहकारी संस्थाबाट दुई लाख र सिवाइसी बचत तथा ऋण सहकारीबाट रु एक लाख ऋण लिएका छन्। बहुसरोकारवाला वन कार्यक्रमले पनि थापालाई आर्थिक सहायता दिएको छ ।