काठमाडौं । राजन पनेरुको पहिलो लघुकथासङ्ग्रह ‘बिन्दुमा सिन्धु’ सार्वजनिक भएको छ ।
लघुकथा समाज नेपालको आयोजनामा राजधानीमा भएको कार्यक्रममा समाजका अध्यक्ष श्रीओम श्रेष्ठ रोदन, मञ्जु काँचुली, डा. रवीन्द्र समीर, नेपालमा लघुकथा विधामा पहिलो विद्यावारिधि गर्ने पुष्करराज भट्ट लगायतले कृति लोकार्पण गरे ।
भट्टले राजनका लघुकथामा सामाजिक विविधता र मानवीय संवेदना उच्च रहेको टिप्पणी गरे । यस्तै, डा. समीरले राजनका लघुकथामा समाजका विविध क्षेत्रमा रहेका विकृति र द्वैध चरित्रमाथि तीव्र व्यङ्ग्य गरिएको बताए ।
अर्का वक्ता साहित्यकार रोदनले बिन्दुमा सिन्धु परिष्कृत लघुकथाहरुको संग्रह भएको उल्लेख गरे ।
कार्यक्रममा मञ्जु काँचुली, डा. रामहरि ढकाल लगायतले पनि मन्तव्य राखेका थिए ।
कविडाँडा साहित्य समाज, चितवनले प्रकाशन गरेको ‘बिन्दुमा सिन्धु’ भित्र ७४ वटा लघुकथा समेटिएका छन् ।
