१९ भदौ,काठमाडौं । सत्ता साझेदार नेपाली कांग्रेस र माओवादी केन्द्रले २ नम्बर प्रदेशका स्थानीय तहको चुनावमा पनि तालमेल गर्ने भएका छन् ।
केही स्थानीय तहमा तालमेलको सहमति भइसकेको र केहीमा वार्ता चलिरहेको कांग्रेस केन्द्रीय सदस्य कल्याण गुरुङले बताए ।
सोमवारमात्रै सर्लाहीको लालबन्दीका दुवै दलबीच तालमेलका सहमति भएको छ । जस अनुसार मेयर माओवादीले पाउने भएको छ भने उपमेयर कांग्रेसले पाउने भएको छ । प्रदेशस्तरबाटै यो सहमति भएको हो ।
तालमेल हुने भएपछि माओवादीबाट मेयरमा केन्द्रीय कार्यालयका सचिव समेत रहेका नेता प्रल्हाद बुढाथोकी उम्मेवार बन्ने भएका छन् ।
तालमेल भएको अवस्थामा आफू उम्मेदवार बन्न तयार रहेको बुढाथोकीले अनलाइनखबरलाई बताए ।
उपमेयरमा कांग्रेसबाट कुबेर आचार्य उम्मेदवार बन्ने भएका छन् । तालमेल नहुँदा उनी मेयरका उम्मेदवार थिए ।
अब लालबन्दीमा कांग्रेस माओवादी गठबन्धनसँग एमाले एक्लै भिड्नुपर्ने भएको छ । एमालेबाट मेयरमा मानवहादुर खड्का र उपमेयरमा शान्ति लामा उम्मेदवार बनिसकेका छन् ।
हरिवनमा पनि तालमेलको प्रयास भइरहेको बुढाथोकीले बताए । हरिवनमा कांग्रेसले मेयर पाउने सम्भावना छ ।
त्यस्तै बागमती,बरहथवा,महोत्तरीको बर्दिबास,कन्चनपुरको कन्चनरुप लगायतका नगरपालिकामा पनि कांग्रेस माओवादी तालमेलको प्रयास भइरहेको छ ।
विशेष गरी एमालेको प्रभाव रहेका र एमालेले जित्ने सम्भावना रहेका स्थानीय तहमा माओवादी र राजपा लगायत दलसँग तालमेल गर्ने नीति लिइएको कांग्रेस नेता रामकृष्ण यादवले बताए । एमालेलाई २ नम्बर प्रदेशमा कमजोर बनाउन तालमेल गरिने उनले बताए ।
माओवादी नेता बुढाथोकीले कांग्रेस र माओवादीबीच पूर्व पश्चिम महेन्द्र राजमार्ग क्षेत्रका स्थानीय तहमा तालमेल भइरहेको बताए ।
राजमार्गको कन्चनरुप,मिर्चैया,लाहान,बर्दि
केही ठाउँमा तालमेलको सहमति भइसकेपनि पार्टीभित्रका आन्तरिक विवाद मिलाउन बाहिर सार्वजनिक नगरिएको स्रोतले जनाएको छ ।
२ नम्बर प्रदेशमा विशेष गरी मधेशमा कुनै पनि दल एमालेसँग तालमेल गर्न चाहिरहेका छैनन् ।
राजमार्ग क्षेत्रमा एमाले पकड रहेका ठाउँमा कांग्रेस माओवादी तालमेल हुँदा २ नम्बर प्रदेशमा पनि पहिलो दल बन्ने एमालेको लक्ष्यमा अवरोध हुनसक्छ ।
राजमार्ग दक्षिणमा पनि एमाले बलियो रहेको र अरुले तालमेल गरे पनि फरक नपर्ने एमाले नेता शत्रुघन महतोले बताए ।
